काठमाडौं । सोमबार अर्थात साउन ३० गते अभियान लघुवित्त वित्तीय संस्थाको आईपीओ बाँडफाँड भएको छ ।
कम्पनीको आईपीओ बिक्री प्रबन्धक मुक्तिनाथ क्यापिटलको कार्यालयमा विहान ९ बजे बाँडफाँड भएको हो ।
कम्पनीको आईपीओमा मागभन्दा धेरै आवेदन परेकाले गोलाप्रथाबाट वितरण गरिएको थियो । रितपूर्वक आवेदन दिने ९१ हजार ३७५ जनाले कम्पनीको सेयर हात पारेका छन्।
कम्पनीको आईपीओ २० लाख ७९ हजार ७८८ जनाको आवेदन परेको थियो । यीमध्ये १९ लाख ८८ हजार ४१३ जनाको हात खाली भएको छ ।
अब कम्पनीको आईपीओ नेपाल स्टक एक्सचेञ्ज (नेप्से) मा सूचीकरणको प्रक्रियामा जानेछ । नेप्सेबाट कम्पनीको आईपीओ पहिलो कारोबारका लागि १०५ रुपैयाँ ३६ पैसादेखि ३१६ रुपैयाँ ८ पैसासम्म ओपन रेञ्ज पाउने संकेत देखिएको छ ।
कम्पनीको आर्थिक वर्ष २०७७/७८ को वास्तविक प्रतिसेयर नेटवर्थ १०५ रुपैयाँ ३६ पैसा रहेको छ । जसका आधारमा कम्पनीको आईपीओले पहिलो कारोबारका लागि १०५ रुपैयाँ ३६ पैसादेखि ३१६ रुपैयाँ ८ पैसासम्म ओपन रेञ्ज पाउने देखिएको हो । नेप्सेले कम्पनीको प्रतिसेयर नेटवर्थको आधारमा तीन गुणासम्म ओपन रेञ्ज तोक्ने गर्दछ ।
कम्पनीले साउन १८ गतेदेखि आईपीओ निष्काशन तथा बिक्री खुला गरेको हो ।
कम्पनीले प्रतिसेयर १०० रुपैयाँ अंकित मूल्यका ९ करोड ७५ लाख रुपैयाँ बराबरको ९ लाख ७५ हजार कित्ता आईपीओ सर्वसाधारणमा निष्काशन गरेको हो ।
कम्पनीले कुल ९ लाख ७५ हजार कित्ता सेयरमध्ये १२ हजार ५०० कित्ता कर्मचारीहरुका लागि र ४८ हजार ७५० कित्ता सामूहिक लगानी कोषहरुका लागि र बाँकी रहेको ९ लाख १३ हजार ७५० कित्ता सेयरका लागि छुट्याएको हो ।
कम्पनीको आईपीओमा लगानीकर्ताले न्यूनतम १० कित्तादेखि ३ हजार कित्तासम्म आवेदन दिन सकिने व्यवस्था गरेको थियो ।
वि.सं.२०७९ साउन ३१ मंगलवार १७:२९ मा प्रकाशित