काठमाडौं । हाइड्रोइलेक्ट्रिसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआईडीसीएल) ले संस्थापक सेयर पुनः लिलामीमा ल्याएइको छ ।
कम्पनीले आज अर्थात भदौ २० गतेबाट २ करोड ३२ लाख ४ हजार ४९५ कित्ता संस्थापक सेयर पुनः लिलाम बिक्री गर्न लागेको हो ।
यसअघि कम्पनीले तेस्रो पटकसम्म लिलामीमा बिक्री खुला गर्दा नबिकेपछि फेरि लिलामीमा ल्याउनुपरेको हो । यस लिलामीमा जो कोही व्यक्ति, संस्था वा कम्पनीले आवेदन दिन सक्ने एचआइडीसीएलले जनाएको छ ।
बोलपत्र पेश गर्ने म्याद असोज ४ गतेसम्म तोकिएको छ । बोलपत्र पेश गर्न चाहनेले न्यूनतम १०० रूपैयाँ वा सोभन्दा बढी मूल्य अंकित गरी पेश गर्नुपर्ने कम्पनीले जनाएको छ ।
उक्त लिलाममा न्यूनतम १०० कित्तादेखि अधिकतम सबै कित्ताका लागि आवेदन दिन सकिनेछ ।
बोलपत्रका लागि बिक्री प्रबन्धक ग्लोबल आइएमई क्यापिटल नक्साल, काठमाडौंबाट आवेदन फाराम लिन र बुझाउन सकिने कम्पनीले जनाएको छ ।
त्यस्तै ग्लोबल आइएमई बैंकको बिर्तामोड, विराटनगर, जनकपुर, वीरगञ्ज, हेटौंडा र नारायणगढ शाखाबाट आवेदन दिन सकिनेछ ।
यसका साथै बैंकको पोखरा, बुटवल, बागलुङ, नेपालगञ्ज, सुर्खेत, घोराही, धनगढी र महेन्द्रनगर शाखाबाट पनि लिलामी भर्न सकिने व्यवस्था छ ।
वि.सं.२०७९ भदौ २० सोमवार १२:०८ मा प्रकाशित
