काठमाडौं । विगत एक वर्षदेखि शिथिल बन्दै आएको सेयर बजार अब कता जाला ? के होला ? भन्ने सर्वत्र चासोको विषय बनिरहेको छ । किन भने दसैंअघिको तीन दिनको कारोबारमा नेप्सेले केही सकारात्मक संकेत देखाएको छ ।
दसैंअघि बजार बढेर बन्द भएको छ । पछिल्ला दिनहरुमा वित्तीय प्रणालीमा तरलता अवस्था केही सहज हुँदै गएको छ । सीडी रेसियो पनि क्रमशः घट्दै आएको छ । लाभांशको सिजन पनि चलेको छ । यस्तै, विगत वर्षहरुका उदाहरण हेर्ने हो भने पनि तरलता र ब्याजदर पनि चक्रीय प्रणालीमा आधारित हुने गरेको छ ।
हाम्रो प्रणालीमा तरलता अभाव भएको पनि लामो समय भइसकेको छ । सोही कारण विगत १ वर्षदेखि ब्याजदर पनि निरन्तर बढिरहेको छ । तर अहिले ब्याजदर उच्च विन्दुमा पुगिसकेको छ । अब विस्तारै उच्च विन्दुबाट तलतिर आउने प्रक्षेपणहरु भइरहेका छन् । पछिल्ला दिनहरुमा वित्तीय प्रणालीमा विस्तारै थपिंदै गएको निक्षेपले पनि यही संकेत गर्दछ ।
चुनाव नजिकिंदैछ, यसले पनि बजारमा पैसाको आपूर्ति वृद्धि गर्न सहयोग पुग्नेछ । किन भने यसबेला औचारिक र अनौपचारिक गरी अरबौं रुपैयाँ खर्च हुनेछ । जसबाट बजारमा पैसाको सप्लाई बढ्न जाने विश्लेषकहरु बताउँछन् । यता, निरन्तर घटेको बजारमा सेयर भाउ निकै सस्तो भइसकेको छ । पीई रेसियोले पनि यसको पुष्टि गर्दछ ।
यस्तो रह्यो साताको सेयर बजार
यस साता नेप्से सूचक ०.८० प्रतिशत ले बढेर १८५३.७६ विन्दुमा बन्द भएको छ । गत साता नेप्से सूचक १८३८.९६ विन्दुमा बन्द भएको थियो । बिहीबार ६३ करोड रुपैयाँ बढीको सेयर कारोबार भएको छ भने बजार पुँजीकरण २६ खर्ब रुपैयाँ भन्दा बढी कायम भएको छ ।
दैनिक कारोबार रकम
आइतबार साताकै उच्च १.०७ अर्ब रुपैयाँभन्दा बढीको सेयर कारोबार भएको थियो भने बुधबार साताकै न्यून ४८ करोड रुपैयाँको कारोबार भयो । यस साता औसतमा दैनिक ७१ करोड रुपैयाँको सेयर कारोबार भएको छ ।
वि.सं.२०७९ असोज १७ सोमवार १२:१५ मा प्रकाशित