काठमाडौं । नेपाल धितोपत्र बोर्ड (सेबोन)सँग आईपीओ निष्कासनको अनुमति माग्न दुइ कम्पनी पुगेको छ । रिपब्लिक मिडिया र माई खोला हाइड्रोपावरले आईपीओ निष्कासनको अनुमति माग्दै बोर्डमा आवेदन दिएका हुन् ।
रिपब्लिक मिडियाले सेबोनमा हिजो कात्तिक २ गते निवेदन दर्ता गराएको छ। सेबोनले अनुमति दिएमा यो कम्पनीले ४३ करोड ५३ लाख रुपैयाँबराबरको आईपीओ बिक्री गर्नेछ। जसअनुसार कम्पनीले १०० अंकित दरका कुल ४३ लाख ५३ हजार कित्ता आईपीओ बिक्री खुला गर्नेछ। कम्पनीको आईपीओ बिक्री प्रबन्धकमा मेगा क्यापिटल मार्केट्स लिमिटेड रहेको छ।
यस्तै, माई खोला हाइड्रोपावरले असोज ३० गते बोर्डमा आवेदन दिएको हो । कम्पनीले १९ करोड २१ लाख ५६ हजार ८०० रुपैयाँ बराबरको १९ लाख २१ हजार ५६८ कित्ता शेयर निष्कासनको लागि अनुमति मागेको छ । कम्पनीको शेयर निष्कासन तथा बिक्री प्रबन्धक प्रभु क्यापिटल लिमिटेड रहेको छ ।
वि.सं.२०७९ कात्तिक ३ बिहीवार १३:४७ मा प्रकाशित
