काठमाडौं । नेपाल राष्ट्र बैंकले प्रकाशित गरेको भदौ महिनासम्मको देशको आर्थिक अवस्था सम्बन्धी प्रतिवेदन अनुसार मूल्य वृद्धि ८.६४ विन्दुमा पुगेको छ ।
नेपाल आयातमा आधारित अर्थतन्त्र भएको हुँदा डलर महंगो हुँदै गएपछि नेपालमा भित्रिने सबै सामाग्री पनि महंगो भएर मुद्रास्फितिमा वृद्धि भएको हो ।
राष्ट्र बैंकले प्रकाशित गरेको आर्थिक तथा वित्तीय स्थिति सम्बन्धी प्रतिवेदन अनुसार आवको पहिलो महिना मूल्य वृद्धि ८.२६ प्रतिशत र दोस्रो महिना ८.६४ प्रतिशत पुगेको छ । अघिल्लो वर्ष भदौ महिनामा मूल्य वृद्धि ३.४९ प्रतिशत मात्रै थियो ।
राष्ट्र बैंकका अनुसार भदौ महिनामा खाद्य तथा पेय पदार्थ समूहको मुद्रास्फिति ८.१७ प्रतिशत र गैर खाद्य तथा सेवा समूहको मुद्रास्फिति ९.०२ प्रतिशत रहेको छ ।
क्षेत्रगत रुपमा तराईमा सबैभन्दा बढी ९.३३ प्रतिशत मूल्यवृद्धि रहेको छ भने पहाडमा ८.८२ प्रतिशत र हिमालमा सबैभन्दा कम ६.६८ प्रतिशत मूल्यवृद्धि रहेको छ । काठमाडौंको मूल्यवृद्धि भने ७.६२ प्रतिशत रहेको छ ।
वि.सं.२०७९ कात्तिक ४ शुक्रवार १३:४९ मा प्रकाशित
