काठमाडौं । सानिमा बैंक लिमिटेडको लाभांश सुरक्षित गर्ने आज अर्थात मंसिर १८ गते आइतबार अन्तिम दिन रहेको छ ।
साधारण सभा प्रयोजन र लाभांश पारिकाका लागि बैंकले भोली मंसिर १९ गते बुक क्लोज गर्ने भएको हुँदा मंसिर १८ गतेसम्म कायम रहने सेयरधनीहरुले मात्र साधारण सभामा भाग लिन र प्रस्तावित लाभांश पाउन सक्नेछन् ।
बैंकले गत आर्थिक वर्षको नाफाबाट १० प्रतिशत बोनस सेयर र कर प्रयोजनका लागि ०.९८ प्रतिशत नगद लाभांश प्रस्ताव गरेको छ ।
प्रस्तावित लाभांश पारितका लागि बैंकले १८औं वार्षिक साधारण सभा बोलाएको छ । साधारण सभा पुस ३ गते आम्रपाली बैंक्वेट, वालुवाटार, काठमाडौंमा बिहान ११ बजे सुरु हुनेछ ।
सभामा अधिकृत पुँजी १२ अर्ब रुपैयाँबाट बढाएर १५ अर्ब रुपैयाँ पुर्याउने प्रस्ताव पनि रहेको छ । साथै, सभामार्फत सर्वसाधारण समूहबाट सञ्चालक समितिमा प्रतिनिधित्व गर्ने २ जना सञ्चालकहरुको निर्वाचन पनि हुनेछ ।
यस्तै, अन्य कुनै बैंक तथा वित्तीय संस्थासँग मर्जर वा एक्विजिसन गर्नुपरेमा सम्पूर्ण कार्यको अख्तियारी सञ्चालक समितिलाई दिने प्रस्ताव रहेको छ ।
वि.सं.२०७९ मंसिर १८ आइतवार ०८:१९ मा प्रकाशित