काठमाडौं । एशियन हाइड्रोपावर कम्पनी लिमिटेडले पहिलो चरणमा आयोजना प्रभावित स्थानीय बासिन्दा र वैदेशिक रोजगारीमा गएका नेपालीहरूका लागि निष्कासन गरेको आईपीओ बाँडफाँड गरिएको छ । बिक्री प्रबन्धक एनएमबि क्यापिटलका अनुसार उक्त आईपीओ मंगलबार बाँडफाँड गरिएको हो ।
कम्पनीले प्रतिकित्ता एक सय अंकित दरमा ३ लाख ४० हजार कित्ता सेयर आयोजना प्रभावित स्थानीयका लागि र ८४ हजार कित्ता आईपीओ वैदेशिक रोजगारीमा गएका नेपालीहरूका लागि निष्कासन गरेको थियो ।
जसमध्ये, आयोजना अति प्रभावित क्षेत्रबाट २५० कित्तासम्म माग गर्ने १२७० जना स्थानीयले २५० कित्ता सेयर नै पाएका छन् । ३०० देखि २५०० कित्तासम्मको लागि आवेदन दिने १११ जनाले २८० कित्ता सेयर पाएका छन् । २८० कित्ता सेयर पाएका १११ जनामध्ये गोलाप्रथाबाट ३ जनाले १० कित्ता सेयर पाएका छन् ।
आयोजना प्रभावित क्षेत्र अन्तर्गत १० देखि ३० कित्तासम्म आवेदन दिने २३८३ जनाले माग बमोजिम कै सेयर पाएका छन् । ४० देखि ६ हजार कित्तासम्म आवेदन दिने ४३६८ जनाले ३० कित्ता सेयर पाएका छन् । ३० कित्ता सेयर पाएका ४३६८ जना मध्ये गोलाप्रथाबाट २२३६ जनाले थप १० कित्ता सेयर पाएका छन् ।
यसका साथै, विदेशमा रहेका नेपाली श्रमिक तर्फ ८५९२ जना योग्य रहेकोमा ८ हजार ४ सय जनाले गोलाप्रथाबाट १० कित्ता सेयर पाएका छन् । कम्पनीको आईपीओको नतिजा निष्कासन तथा बिक्री प्रबन्धक एनएमबि क्यापिटल लिमिटेडको वेबसाइटबाट हेर्न सकिन्छ ।
वि.सं.२०७९ माघ ११ बुधवार १३:१५ मा प्रकाशित
