काठमाडौं । एसियन हाइड्रोपावरको आइपीओमा आवेदकको ओइरो लागेको छ । कम्पनीको आइपीओमा मागभन्दा १३.९५ गुण बढी आवेदन परेको छ । यसमा ९७ करोड २९ लाख ५५ हजार रुपैयाँ बराबरको आवेदन परेको छ ।
सीडीएसका अनुसार आज (माघ २९ गते) सम्ममा ८ लाख ६५ हजार ६१७ जनाले ९७ लाख २९ हजार ५ सय ५० कित्ताका लागि आवेदन दिएका हुन् । यो सर्वसाधारणलाई निष्काशन गरेको ६ लाख ९७ हजार २०० कित्ता शेयरको मागभन्दा १३.९५ गुणा बढी आवेदन हो ।
कम्पनीले जारी पूँजी ३४ करोड रुपैंयाको २४।७१ प्रतिशतका दरले ८ करोड ४० लाख रुपैंया बराबरको प्रतिसेयर १०० रुपैंया अंकित मूल्यका ८ लाख ४० हजार कित्ता साधारण सेयर मध्ये ८४ हजार कित्ता सेयर बैदेशिक रोजगारीमा रहेका नेपालीहरुका लागि ४२ हजार कित्ता सेयर सामुहिक लगानी कोषहरुमा बाँडफाँड गरी कर्मचारीहरुका लगि १६ हजार ८ सय कित्ता सेयर सुरक्षित गरी बाँकी रहेको ६ लाख ९७ हजार २ सय कित्ता सर्वसाधारणलाई निष्काशन गरेको हो ।
लगानीकर्ताले यस आईपीओमा न्यूनतम १० कित्तादेखि अधिकतम २० हजार कित्तासम्म आवेदन दिन सक्नेछन् । यसमा छिटोमा फागुन २ गतेसम्म र ढिलोमा फागुन १२ गतेसम्म आवेदन दिन सकिन्छ ।
आईपीओ निष्काशन तथा बिक्री प्रबन्धकमा एनएमबी क्यापिटल रहेको छ । लगानीकर्ताले नेपाल धितोपत्र बोर्डबाट स्विकृती प्राप्त गरेका सम्पूर्ण आस्वा सदस्य बैंक तथा वित्तिय संस्थाहरु र तिनका तोकिएका शाखाहरुबाट आवेदन दिन सकिनेछ ।
वि.सं.२०७९ माघ २९ आइतवार १९:२४ मा प्रकाशित
