काठमाडौं । भूगोल इनर्जी डेभलपमेन्ट कम्पनीको आइपीओमा १ अर्ब ३७ करोड ११ लाख ९५ हजार रुपैयाँको आवेदन परेको छ ।
सीडीएसका अनुसार आज अन्तिम दिन (चैत २७ गते) सम्म १२ लाख २६ हजार ६५९ जनाले १ करोड ३७ लाख ११ हजार ९५० कित्तका लागि आवेदन दिएका छन् । यो सर्वसाधारको लागि बिक्री खुला गरिएको कित्तालाई आधार मान्दा १०.१७ गुणा बढी हुन आउँछ ।
तसर्थ, यसमा १ लाख ३४ हजार ६९९ जनाले मात्र सेयर हात पार्नेछन् । बाँकी १० लाख ९१ हजार ९६० जना भने आइपीओ पाउनबाट बञ्चीत हुनेछन् ।
कम्पनीले चैत २३ गतेदेखि सर्वसाधारणका लागि आइपीओ बिक्रीमा ल्याएको हो । कम्पनीले जारी पूँजी ५४ करोड ४० लाख ५३ हजार ४०० रुपैयाँको २० प्रतिशत अर्थात १० करोड ८८ लाख १० हजार ७०० रुपैयाँ बराबरको प्रतिशेयर १०० रुपैयाँ दरका १० लाख ८८ हजार १०७ कित्ता साधारण शेयर सर्वसाधारणका लागि निष्काशन गर्न लागेको हो।
जसमध्ये १ लाख ८ हजार ८११ कित्ता शेयर वैदेशिक रोजगारीमा रहेका नेपालीहरुका लागि तथा कर्मचारीहरुका लागि सुरक्षित गरिएको शेयर बाँडफाँड गरिसकेको छ भने ७१ हजार ९१६ कित्ता शेयर सामूहिक लगानी कोषहरुका लागि सुरक्षित गरिएको छ। सर्वसाधारण लगानीकर्ताले कुल १३ लाख ४६ हजार ९९३ कित्ता शेयरका लागि आवेदन दिने व्यवस्था रहेको थियो।
वि.सं.२०७९ चैत २७ सोमवार १७:२८ मा प्रकाशित