काठमाडौं । धितोपत्र बजारमा नयाँ स्टक एक्सचेन्ज र वस्तु विनिमय बजार (कमोडिटी मार्केट) सञ्चालनका लागि इजाजत लिन समान तीन/तीन वटा कम्पनीको आवेदन परेको छ ।
नयाँ स्टक एक्सचेन्ज र कमोडिटी मार्केटको इजाजत पत्र लिनका लागि आवदेन दिने आज अन्तिम दिन रहेकोमा छ वटा कम्पनीको आवेदन दर्ता भएको नेपाल धितोपत्र बोर्डले जनाएको छ ।
हिमालयन स्टक एक्सचेन्जले शुक्रबार आवेदन दिएको थियो भने नेसनल स्टक एक्सचेन्ज अफ नेपालले आइतबार दिउँसो निवेदन दिएकोमा आइतबार नै अन्नपूर्ण स्टक एक्सचेन्जले समेत आवेदन दिएको नेपाल धितोपत्र बोर्डका सहायक प्रवक्ता तेजप्रसाद सापकोटाले बताए ।
बोर्डले एक वटा स्टक एक्सचेन्ज र दुई वटा कमोडिटिज एक्सचेन्ज सञ्चालन अनुमतिको लागि अनुमति माग गरेकोमा आइतबार आवेदन दिने अन्तिम दिन हो ।
स्रोतका अनुसार हिमालयन स्टक एक्सचेन्जमा नेपाल उद्योग वाणिज्य महासंघका पूर्व अध्यक्षहरु पशुपति मुरारका, भवानी राणा, शेखर गोल्छासहित हिमालयन रिइन्स्योरेन्स कम्पनीका सञ्चालकहरुको मुख्य स्वामित्व रहेको छ । हिमालयनमा शंकर ग्रुपका शंकरलाल अग्रवालको मुख्य लगानीसँगै राजेन्द्र खेतान, अमित मोर, सौरभ ज्योति, जुनि गुरुङ, आशिश श्रेष्ठ र दीपक भट्टको मुख्य लगानी रहेको बताइएको छ ।
नेशनल स्टक एक्सचेन्जमा भने गैरआवासीय नेपाली संघका पूर्व अध्यक्षहरु उपेन्द्र महतो, जीवा लामिछानेसहित वर्तमान अध्यक्षद्वय बद्री केसी र कुल आचार्यसहित सिद्धार्थ समूह र अग्नि समूहको मुख्य लगानी रहेको छ । स्रोतका अनुसार कम्पनीको सञ्चालकहरुमा क्याबिनेट दीपक तिमिल्सिना, महेश कुमार श्रेष्ठ, ऋषी अग्रवाल, अंकित केडिया रहेको बताइएको छ ।
त्यस्तै अन्नपूर्ण स्टक एक्सचेन्जमा गणेशकुमार श्रेष्ठ, सुरेन्द्रराज वाग्ले, अनिल सापकोटा, प्रकाशकुमार श्रेष्ठ, शेखर सुवेदी, बलराम उप्रेती, अन्नपूर्ण मिडिया हाउसका रामेश्वर थापा र राष्ट्र बेंकका पूर्व कार्यकारी निर्देशक नारायण पौडेल समेत रहेको बताइएको छ ।
नेपाल धितोपत्र बोर्डले ३ वटा निवेदनमध्ये एक वटालाई स्टक एक्सचेन्ज सञ्चालनको अनुमति दिनेछ।
बोर्डका अनुसार कमोडिटिज एक्सचेन्ज सञ्चालनका लागि पनि ३ वटा आवेदन परेको छ ।
सहप्रवक्ता सापकोटाका अनुुसार मल्टि डेरिभेटिज एक्सचेन्ज (मेक्स), मल्टी एसेट्स एन्ड डेरिभेटिभ एक्सचेन्ज र हिमालयन कमोडिटिज एन्ड डेरिभेटिभ एक्सचेन्जले कमोडिटी एक्सचेन्ज सञ्चालनको लागि आवेदन दिएको छ । ३ वटा आवेदकमध्ये बोर्डले २ वटा कम्पनीलाई कमोडिटिज एक्सचेन्ज सञ्चालनको अनुमति दिनेछ ।
वि.सं.२०८० वैशाख १० आइतवार १७:४८ मा प्रकाशित