काठमाडौं । हिमालयन लाइफ इन्स्योरेन्स कम्पनीका नव नियुक्त अध्यक्ष सुलभ अग्रवालले पद तथा गोपनियताको शपथ ग्रहण गरेका छन् । उनले नेपाल बीमा प्राधिकरणका अध्यक्ष सूर्य प्रसाद सिलवालबाट पद तथा गोपनियताको शपथ ग्रहण लिएका हुन् ।
प्राइम लाइफ, यूनियन लाइफ र गुराँस लाइफ मर्जर भएर आजदेखि हिमालयन लाइफको नाममा एकिकृत कारोबार शुभारम्भ भएको छ ।
मर्जर पछि सञ्चालक समितिमा युनियन लाइफको तर्फबाट अध्यक्ष सुलभ अग्रवाल सहित जीवन कुमार अग्रवाल नियुक्त भएका छन् । त्यस्तै साविक प्राइम लाइफको तर्फबाट राजिव प्रसाद प्याकुरेल र प्रमिला केसी थापा नियुक्त भएका छन् । साविक गुराँस लाइफको तर्फबाट विवेक दुगर र सौरभ दुगर नियुक्त भएका छन् । साविक युनियन लाइफकै कम्पनी सचिव इश्वर कुमार सेढाइले निरन्तरता पाएका छन् ।
हिमालयन लाइफको प्रमुख कार्यकारी अधिकृत पनि साविक युनियन लाइफकै मनोज कुमार लाल कर्णले निरन्तरता पाएका छन् । नायव प्रमुख कार्यकारी अधिकृतमा गुराँस लाइफका प्रमुख कार्यकारी अधिकृत विपिन कुमार लाल कर्ण र साविक युनियन लाइफका कपिल कुमार दाहाल रहेका छन् ।
वि.सं.२०८० वैशाख २६ मंगलवार १४:१७ मा प्रकाशित