काठमाडौं, ७ जेठ । राष्ट्रिय बीमा संस्थानले पूँजी थप्ने प्रस्ताव सहित विशेष साधारण सभा बोलाएको छ । संस्थानले जेठ २२ गते अपरान्ह ४ बजे, संस्थानको प्रधान कार्यालय, रामशाह पथ, काठमाडौंमा विशेष साधारण सभा बोलाएको हो ।
सभाले नेपाल बीमा प्राधिकरणको निर्देशन अनुसार तयार गरिएको संस्थानको पूँजी योजना अध्ययन प्रतिवेदन २०७९ अनुरुप नेपाल सरकार, नेपाल राष्ट्र बैंक, नेपाल बैंकले आफ्नो लगानीको हिस्सा बापत हकप्रद शेयर मार्फत थप गर्नुपर्ने पूँजी रकम वृद्धि गर्न आह्वान गर्ने प्रस्ताव पारित गर्नेछ ।
प्राधिकरणको निर्देशन अनुसार संस्थानले असार मसान्तसम्ममा न्युनतम ५ अर्ब रुपैयाँ चुक्ता पूँजी पुर्याउनु पर्नेछ । हाल संस्थानको चुक्ता पूँजी १८ करोड १० लाख २० हजार रुपैयाँ मात्रै रहेको छ ।
संस्थानमा हाल नेपाल सरकारको २७.७८ प्रतिशत, नेपाल राष्ट्र बैंकको ५५.५५ प्रतिशत र नेपाल बैंकको १६.६७ प्रतिशत शेयर स्वामित्व रहेको छ ।
नयाँ बीमा ऐन २०७९ लागू भएपनि सरकारी स्वामित्वको संस्थान परिणत गर्नुपर्नेछ । सोही व्यवस्थान अनुसार संस्थानले संस्थापकलाई पूँजी थप्न लगाएर सर्वसाधारणलाई आईपीओ निष्काशन गर्नेछ ।
वि.सं.२०८० जेठ ७ आइतवार १२:०० मा प्रकाशित