काठमाडौं, ९ जेठ । बागमती प्रदेश श्रम रोजगार तथा यातायात मन्त्रालयले २० बर्ष पुगेका सवारीसाधनलाई हटाउन निर्देशन दिएको छ । एक सूचना जारी गर्दै बागमती प्रदेशले २० वर्ष पुगेका सवारी साधन ३५ दिनभित्र हटाउन निर्देशन जारी गरेको हो ।
सूचना अनुसार मन्त्रालयले विद्युतीय सवारी साधनको हकमा ३० वर्ष र अन्य सवारीसाधनको हकमा २० वर्ष नाघेका सार्वजनिक सवारी साधनलाई हटाउन ३५ दिने निर्देशन दिएको हो ।
‘बागमती प्रदेश सरकारले प्रदेशभित्रको सवारी तथा यातायात क्षेत्रको व्यवस्थापनको लागि जारी गरेको प्रदेश सवारी तथा यातायात व्यवस्था ऐन, २०७५ को दफा १९ (४) मा शुरु दर्ता भएको मितिले विद्युतीय सवारी साधनको हकमा तीस वर्ष र अन्य सवारी साधनको हकमा बीस वर्ष नाघेका सार्वजनिक सवारी साधनलाई पत्रु गर्नुपर्ने व्यवस्था गरेको छ,‘ सूचनामा भनिएको छ ।
सोहि अनुसार यो सूचना प्रकाशित भएको मितिले ३५ दिन भित्र प्रचलित कानुन बमोजिम आफ्नो सवारी साधनको हालसम्म तिर्नु बुझाउनुपर्ने राजश्व बुझाई सवारी साधन पत्रु गर्ने कार्य सम्पन्न गर्न सूचना प्रकाशन गरेको जनाएको छ ।
वि.सं.२०८० जेठ ९ मंगलवार १३:५५ मा प्रकाशित
