काठमाडौँ, १० जेठ । नेपाल टेलिकमले कम्पनीमा जागिर खुलेको खबर गलत रहेको भन्दै ध्यानाकार्षण गरेको छ।
कम्पनीले आज एक विज्ञप्ति जारी गर्दै नेपाल टेलिकममा जागिर खुलेको भन्ने खबर गलत रहेको स्पष्ट पारेको हो। ‘केही दिनयता ‘नेपाल टेलिकमका विभिन्न शाखाहरुमा काम गर्न भ्याकेन्सी खोलिएको’ भनेर कम्पनीका पदाधिकारीहरुको नामसमेत जोडी विभिन्न फेसबुक ग्रुप र म्यासेन्जर तथा ह्वाट्सएपलगायतका सामाजिक सञ्जालमार्फत गलत सूचना प्रवाह भएको सम्बन्धमा कम्पनीको गम्भीर ध्यानाकर्षण भएको छ’, विज्ञप्तिमा उल्लेख छ।
कर्मचारी आवश्यकतासम्बन्धी सूचना कम्पनीले राष्ट्रिय दैनिक गोरखापत्र तथा कम्पनीको वेबसाइटमा मात्र आधिकारिक रुपमा सार्वजनिक गर्ने गरेकोले यस प्रकारका गलत सूचनाको भ्रममा नपरी आधिकारिक माध्यमबाट सम्प्रेषित सूचनालाई मात्र ग्रहण गरिदिन नेपाल टेलिकमले जनाएको छ।
वि.सं.२०८० जेठ १० बुधवार १७:४७ मा प्रकाशित
