काठमाडौं। सरकारले टीकापुर हत्याकाण्डमा तीन तहका अदालतबाट दोषी ठहर भएका रेशम चौधरीलाई कानूनविपरीत आममाफी दिने तयारी सुरु गरेको छ । हालै मात्र सर्वोच्च अदालतले जिल्ला र उच्च अदालतले सुनाएको जन्मकैदको फैसला सदर गरेको थियो ।
२०७२ भदौमा कैलालीको टीकापुर घटनामा संलग्न भएको भन्दै अदालतले रेशमलाई जन्मकैदको सजाय सुनाएको थियो। अदालतको फैसला मुताविक उनी कैद भुक्तान गरिरहेका छन्।
संविधानको धारा २७६ मा राष्ट्रपतिले कुनै अदालत, न्यायिक वा अर्धन्यायिक निकाय वा प्रशासकीय पदाधिकारी वा निकायले गरेको सजायलाई कानून बमोजिम माफी, मुल्तवी, परिवर्तन वा कम गर्न सक्ने व्यवस्था छ । त्यसै व्यवस्थामा टेकेर राष्ट्रपतिबाट गणतन्त्र दिवसका अवसरमा जेठ १५ गते आम माफी दिने तयारी सरकारले गरेको हो ।
चौधरीको माफीका लागि लगिएको फाइल ठूलो भएकोले अध्ययन गर्न बाँकी रहेको र अध्यनपछि राष्ट्रपति रामचन्द्र पौडेल समक्ष जाहेर गरिने छ। फाइल बुधबार दिउँसो राष्ट्रपति कार्यालय पुगेको र शुक्रबार अध्ययन गरिने स्रोतले जनाएको छ।
वि.सं.२०८० जेठ ११ बिहीवार १७:१९ मा प्रकाशित
