काठमाडौं। देशकै ठूलो सुपरमार्केट सञ्जाल भाटभटेनी सुपरमार्केटका सञ्चालक मीनबहादुर गुरुङ पक्राउ परेका छन्। ललिता निवास प्रकरणमा नेपाल प्रहरीको केन्द्रीय अनुसन्धान ब्युरो (सिआइबी) ले गुरुङलाई उनको निवास नक्सालबाट पक्राउ गरेको हो।
ललिता निवासको २ सय ९९ रोपनी ३ आना सरकारी जग्गा हिनामिना प्रकरणमा उनी आरोपित थिए। उनी नेपाल प्रहरीको फरार सूचीमा रहेका थिए। नेपालकै सबैभन्दा ठूलो चेन सुपरमार्केट सञ्चालक मीनबहादुर गुरुङलाई शिव शिखर सहकारीको अर्बौं रुपैयाँ अपचलन गरेको आरोप पनि लागेको छ।
नेपाल प्रहरीको केन्द्रीय अनुसन्धान ब्यूरो (सिआइबी)ले शिवशिखर सहकारीका अध्यक्ष केदारनाथ शर्मालाई पक्राउ गरेपछि गुरुङलाई पनि प्रहरीले नियन्त्रण गरेको हो । स्रोतका अनुसार गुरुङले सहकारीको ६ अर्ब हाराहारी रकम लिएर नतिरेपछि सहकारी नै डुबेको थियो।
झन्डै १ लाख सदस्यबाट उठाएको रकम अध्यक्ष शर्मा र गुरुङ मिलेर अपलचन गरेको प्रहरी स्रोतको दाबी छ।
वि.सं.२०८० असार १२ मंगलवार १२:१२ मा प्रकाशित