काठमाडौं । लक्ष्मी बैंक र सनराइज बैंक एक आपसमा मर्ज भएर यहि असार २८ गतेदेखि एकीकृत कारोबार गर्ने भएका छन् । गत जेठ ८ गते लक्ष्मी बैंक र सनराइज बैंकबीच मर्जरका लागि अन्तिम सम्झौता भएको थियो ।
नेपाल राष्ट्र बैंकले मर्जरमा जानका लागि दुई दिनभित्र अन्तिम स्वीकृति दिने तयारी गरिरहेको बताएको छ । राष्ट्र बैंकको स्वीकृति पाउने बित्तिकै एकीकृत कारोबार गर्ने बैंकका एक सञ्चालकले बताए ।
यी दुई बैंकले गत पुस २५ मा मर्जरसम्बन्धी प्रारम्भिक सम्झौता गरेका हुन् । ड्यु डिलिजेन्स अडिटरको प्रतिवेदनका आधारमा दुवै बैंक १ः१ को स्वाप रेसियोमा मर्ज हुनेछन् ।
नाममा दुवै बैंकका सञ्चालकबीच विवाद हुने देखिएपछि राष्ट्र बैंकले नै बैकको नाम तोकेर पठाउने तयारी गरेको स्रोतले जानकारी दिएको छ । राष्ट्र बैंकले केही दिन अघि दुवै बैंकका सञ्चालकलाई बोलाएर मर्जरपछि बन्ने बैकको नाम राख्नेबारे छलफल गरेको थियो । त्यसबेला दुवै बैंकका सञ्चालकले आ-आफ्नो बैंककै नाम नै हुनुपर्ने दावी गरेका थिए ।
मर्जरपछि लक्ष्मी बैंकका हालका प्रमुख कार्यकारी अधिकृत अजय विक्रम शाह बैंकको प्रमुख कार्यकारी अधिकृत हुने छन् । गाभिएपछि बन्ने बैंकको सञ्चालक समितिको प्रथम बैठकले सञ्चालक समितिको अध्यक्षको चयन गर्नेछ ।
नयाँ बन्ने बैंकको चुक्ता पुँजी २१ अर्ब ६७ करोड २ लाख ३८ हजार रुपैयाँ पुग्ने छ । हाल लक्ष्मी बैंकको ११ अर्ब ५५ करोड १३ लाख ४५ हजार १ सय चुक्ता पुँजी रहेको छ भने सनराइज बैंकको चुक्ता पुँजी १० अर्ब ११ करोड ८८ लाख ९२ हजार ९ सय रहेको छ ।
वि.सं.२०८० असार २२ शुक्रवार ०७:०१ मा प्रकाशित