काठमाडौ । विकास बैंकहरुले साउनमा ब्याजदर घटाउने निर्णय गरेका छन्।
विकास बैंकहरुको छाता संगठन डेभलपमेन्ट बैंकर्स एसोसिएसन नेपालको शुक्रबार बसेको बैठकले साउनमा निक्षेपको ब्याजदर घटाउने निर्णय गरेको हो। एसोसिएसनले ०.५० प्रतिशतको विन्दुले ब्याजदर घटाउने निर्णय गरेको छ।
अब साउनमा राष्ट्रियस्तरका विकास बैंकहरुले संस्थागत मुद्दति निक्षेपमा अधिकतममा ८.१० प्रतिशत र व्यक्तिगत मुद्दति निक्षेपमा १०.१० प्रतिशत कायम गर्ने भएका छन्।
अहिले विकास बैंकहरुले संस्थागत मुद्दति निक्षेपमा अधिकतममा ८.६० प्रतिशत र व्यक्तिगत मुद्दति निक्षेपमा १०.६० प्रतिशत ब्याज दिइरहेका छन्।
क्षेत्रीयस्तरका विकास बैंकले असारमा संस्थागत मुद्दति निक्षेपमा अधिकतममा ८.८५ प्रतिशत र व्यक्तिगत मुद्दति निक्षेपमा १०.८५ प्रतिशत ब्याज दिइरहेका छन्। अब साउनमा घटाएर क्रमशः ८.३५ प्रतिशत र १०.६५ प्रतिशत दिनेछन्।
विकास बैंकहरुले असारमा निक्षेपको ब्याजदर स्थिर राखेका थिए। ‘तरलता थुप्रिएको अवस्थामा ब्याजदर स्थिर राख्नु उचित नदेखिएकोले घटाउने निर्णय भएको हो’, एक विकास बैंकका सीईओले बताए।
वाणिज्य बैंकहरुको छाता संगठन नेपाल बैंकर्स एसोसिएसन(एनबीए)को बिहीबार बसेको बैठकले यसअघिको भद्र सहमति हटाउँदै बैंकहरु आफैँले ब्याजदर निर्धारण गर्ने बाटो खुला गरिएको थियो।
वि.सं.२०८० असार २९ शुक्रवार २१:२६ मा प्रकाशित
