काठमाडौं । भारतले प्याजमा ४० प्रतिशत निर्यात कर लगाएपछि नेपालमा प्याजको भाउ मंहगिन सुरु गरेको छ । हिजो कालिमाटीमा थोक प्याजको मूल्य ६१ रुपैयाँ थियो भने खुद्रा मूल्य सरदर ६५ रुपैयाँमा किनबेच हुँदै आएको थियो ।
तर, भारतले प्याजमा ४० प्रतिशत निर्यात कर लगाएको सुईको पाउन साथ व्यापारीले प्याजको मूल्य एकाएक बढाएका छन् । आज कालिमाटीमा प्याजको थोक मूल्य प्रतिकिलो ७८ रुपैयाँ पुगेको छ भने खुद्रा मूल्य ८० रुपैयाँको हाराहारीमा रहेको छ ।
एक खुद्रा व्यापारीलाई प्याजको मूल्य सोध्दा भने ‘आज लगे ८० रुपैयाँ भोलिदेखि १०० रुपैयाँ ।’ भारतले प्याज निर्यातमा ४० प्रतिशत भन्सार कर लगाउने निर्णय गरेको दोस्रो दिनदेखि नै नेपालमा मूल्यवृद्धि सुरु भएको छ ।
प्याजको उत्पादनमा आएको कमीसँगै मूल्यवृद्धि बढेपछि भारतले प्याजमा निर्यात कर लगाएको हो ।भारतीय वित्त मन्त्रालयले शनिबार एक सार्वजनिक सूचना जारी गर्दै आगामी डिसेम्बर अन्त्यसम्म ४० प्रतिशत निर्यात कर लगाएको हो । कर लगाइएपछि निर्यातमा कमी आउने र आन्तरिक आपूर्तिमा सुधार भई मूल्यवृद्धि नियन्त्रण हुने भारतको दाबी छ ।
वि.सं.२०८० भदौ ४ सोमवार १३:२७ मा प्रकाशित
