काठमाडौं । वाणिज्य बैंकका प्रमुख कार्यकारी अधिकृतहरुको छाता संस्था नेपाल बैंकर्स एशोसिएसन(एनबीए)का अध्यक्ष सुनिल केसीले बैंकको ब्याजदर घट्ने बताएका छन् ।
मंगलबार पत्रकार सम्मेलनमा बोल्दै केसीले अहिले ब्याजदर बजारलाई नै छोड्नुपर्छ भन्ने मान्यतामा संघ रहेको जानकारी गराए । यता, स्थानीय तहको ६० प्रतिशत रकमलाई निक्षेपमा गणना गर्ने व्यवस्था कार्यान्वयनमा आएपछि तरलता अवस्था सहज र ब्याजदर घट्नसक्ने पनि संघ अध्यक्ष केसीले बताएका छन् ।
उनले भने, ‘स्थानीय तहको ६० प्रतिशत रकमलाई निक्षेपमा गणना गर्न दिने बारे छलफल भइरहेको छ । उक्त व्यवस्था कार्यान्वयनमा आयो भने पुनः निक्षेप बढ्छ ।’ अहिले तरलताको अवस्था बाहिर भनिए जस्तो नरहेको पनि केसीले बताए ।
यसअघिको स्थानीय तहकोे ८० प्रतिशत रकम निक्षेपमा गणना गर्न पाउने व्यवस्था हट्दा निक्षेपमा समस्या आएको उनको भनाई छ ।
उक्त व्यवस्था हट्दा ९० अर्ब रुपैयाँ बराबरको रकम बैंकिङ प्रणालीबाट बाहिरिएको केसीले जानकारी गराएका छन् । अध्यक्ष केसीले अन्तर्राष्ट्रियस्तरमा नै ब्याजदर बढ्दै गएको अवस्थामा नेपालको ब्याजदर घट्नुलाई सकारात्मक रुपमा लिएका छन् । तरलता सहज हुँदै गएमा ब्याजदर अझै घट्ने अध्यक्ष केसीले बताए ।
वि.सं.२०८० भदौ १२ मंगलवार १७:३३ मा प्रकाशित
