काठमाडौं । राष्ट्रिय बीमा संस्थानले डेढ अर्ब रुपैयाँबराबरको आईपीओ ल्याउने भएको छ।
नियामक नेपाल बीमा प्राधिकरणले तोकेको चुक्तापुँजी पुर्याउने योजनाअन्तर्गत संस्थानले १ अर्ब ५० करोड रुपैयाँको आईपीओ ल्याउने तयारी गरेको हो। संस्थानलाई कम्पनी लिमिटेडमा परिणत गर्न लागेको छ। यसका लागि संस्थानले आज भदौ १५ गते विशेष साधारणसभा पनि बोलाएको छ। कम्पनीमा परिणत भएपछि आईपीओ निष्कासन गर्ने तयारीमा संस्थान रहेको छ।
आईपीओ बिक्रीपछि संस्थानमा संस्थापक समूहको ७० र सर्वसाधारणको ३० प्रतिशत सेयर स्वामित्व रहनेछ।
बीमा प्राधिकरणले तोकेबमोजिम संस्थानले ५ अर्ब रुपैयाँ चुक्तापुँजी पुर्याउनुपर्नेछ। हाल संस्थानको पुँजी १८ करोड १० लाख २० हजार रुपैयाँ रहेको छ।
आईपीओ बिक्रीपछि पनि प्राधिकरणले तोकेको चुक्तापुँजी कायम गर्न संस्थानले ३ अर्ब ३१ करोड ८९ लाख ८० हजार रुपैयाँ जुटाउनुपर्ने देखिन्छ। यसका लागि संस्थापक सेयरधनीले बाँकी रकम जुटाउनुपर्नेछ।
वि.सं.२०८० भदौ १५ शुक्रवार १०:३१ मा प्रकाशित