काठमाडौं । नेपाल आयल निगमले १४.२ केजीभन्दा बढी क्षमताका ग्यास सिलिन्डर बिक्री गरेमा कारवाही गर्ने भएको छ ।
निगमले आज एक विज्ञप्ति जारी गर्दै ‘ग्यास उद्योगहरुले १४.२ केजी क्षमताभन्दा बढी ५० केजी र ४५० केजी क्षमताका सिलिण्डरमा एलपी ग्यास बिक्री वितरण गरेको पाइएको भन्दै उक्त विक्री वितरण कार्य तुरुन्त बन्द गर्न’ भनेको हो ।
निर्धारित तौलभन्दा बढी क्षमताका सिलिण्डरमा ग्यास भरी विक्री वितरण गरेको पाइएमा एलपी ग्यास विनियमावली, २०६५ (संशोधनसहित) बमोजिम कारबाही हुने निगमले जनाएको छ ।
निगमका अनुसार ग्यास उद्योगले बढी क्षमताका सिलिण्डरमा ग्यास भरी बिक्री वितरण गर्न अनुमति मागे पनि ‘एलपी ग्यास विनियमावली २०६५’ अनुसार दिन नसकिने जानकारी गराइएको थियो ।
वि.सं.२०८० असोज ४ बिहीवार १७:५३ मा प्रकाशित
