विराटनगर, ११ असोज । कोशी प्रदेश सरकारले भोली असोज १२ गते सार्वजनिक विदा दिने भएको छ । प्रदेश मन्त्रिपरिषद्को आज बसेको बैठकले २०८० असोज १२ गते भोली करम धर्म पर्वको उपलक्ष्यमा कोशी प्रदेशमा उराव तथा झाँगर समुदायलाई सार्वजनिक बिदा दिने निर्णय भएको हो ।
बैठकले झापाको अर्जुनधारा नगरपालिका र अमेरिकाको टेक्सासबीच भगिनी सम्बन्ध कायम गर्न नेपाल सरकारको पूर्वस्वीकृति लिन सिफारिस गर्ने निर्णय गरेको छ ।
बैठकमा उच्चस्तरीय प्रशासन सुधार कार्यदलको प्रतिवेदन, २०८० सार्वजनिकीकरण गर्ने, कृषि आयमा लगाउँदै आएको कर प्रदेश सञ्चित कोषमा दाखिला गर्ने व्यवस्थाका लागि नेपाल सरकार, अर्थमन्त्रालयलाई अनुरोध गर्ने निर्णय भएको छ ।
यस्तै प्रदेश सामयिक कर असुलसम्बन्धी विधेयकको मस्यौदा गर्न सैद्धान्तिक स्वीकृति लिने, सरकारको प्रवक्तामा आन्तरिक मामिला तथा कानूनमन्त्रीलाई तोक्ने निर्णय भएको मुख्यमन्त्री हिक्मतकुमार कार्कीका प्रेस सल्लाहकार महेन्द्र विष्टले जानकारी दिनुभयो ।
वि.सं.२०८० असोज ११ बिहीवार २०:४६ मा प्रकाशित
