काठमाडौं । ‘च्याउ किसानहरूको जागरुकता, व्यावसायिक उत्पादनद्वारा आत्मनिर्भरता’ भन्ने नाराकासाथ काठमाडौंमा च्याउ मेला तथा परिकार महोत्सव गरिएको छ । पुस १५ गते राष्ट्रिय च्याउ दिवसको अवसरमा यस क्षेत्रको प्रवद्र्धन गर्ने उदेश्यले मेला गरिएको हो । च्याउ उत्पादक किसान संघ नेपालको आयोजनामा ललितपुरको जावलाखेल मैदानमा भएको मेलाको सभामुख देवराज घिमिरेले उद्घाटन गरे ।
मेलामा विभिन्न ३० ओटा स्टलमार्फत च्याउ खेतीको प्रवद्र्धन गरिएको थियो । मेलाका माध्यमबाट प्रचारको काम बढी भएको र यसको उत्पादनबारे जानकारी एवं स्वास्थ्यका लागि पुग्ने फाइदाबारे बुझाउन मेलाले महत्वपूर्ण सहयोग गरेको व्यवसायी दीपक न्यौपानेले जानकारी दिए । मेलामा सबै व्यवसायीले ल्याएका च्याउ बिक्री भएको र मानिसहरुमा च्याउ सेवनप्रति उच्च चेतना रहेको पाइएको न्यौपानले बताए ।
विदेशबाट च्याउ ल्याउने काम रोकिने वातावरण भएमा उत्पादकहरुलाई राहत मिल्ने मेलामा सहभागीहरुको भनाइ थियो । पाते च्याउमा नेपाल आत्मनिर्भर भइसकेको जानकारी दिँदै व्यवसायी न्यौपानेले डल्ले च्याउमा छिट्टै आत्मनिर्भर हुने अवस्था रहेको बताए । राजा च्याउ मासुको परिकारको रुपमा बढि प्रयोग हुने अवस्था रहेको उनले बताए । यता सिताके च्याउ कम उत्पादन हुने हुँदा यसका लागि कच्चापदार्थ उपलब्ध हुनुपर्ने अवस्था रहेको न्यौपानेले बताए ।
मेलामा कन्ये, गोभ्रे, किङ वयस्टर, सिताकेलगायतका च्याउका विभिन्न जात तथा परिकारहरू राखिएको थियो । ७ हजारभन्दा बढी अवलोकनकर्ताहरुले मेला अवलोकन गरेको आयोजकले जनाएको छ । मेलामा च्याउसम्बन्धी जागरण ल्याउने विभिन्न सांस्कृतिक कार्यक्रमका साथै च्याउ उत्पादकहरुलाई सम्मान गरिएको थियो । २०७७ सालदेखि हरेक वर्ष पुस १५ गते विभिन्न कार्यक्रम गरी च्याउ दिवस मनाउँदै आइएको छ ।
वि.सं.२०८० पुस १५ आइतवार १९:५६ मा प्रकाशित