काठमाडौं । नेपाल विद्युत् प्राधिकरणले बक्यौता रकम तिर्न बाँकी उद्योगहरुलाई ६० महिनाको समयावधि दिएको छ ।
प्राधिकरणले सूचना जारी गर्दै डेडिकेटेड र ट्रंकलाइनको बक्यौता महशुल बुझाउन बाँकी उद्योगहरुलाई अबको ३० दिनभित्र प्राधिकरणको सम्बन्धित वितरण केन्द्रमा सम्पर्क राखी किस्ताबन्दीको सुविधाका लागि आवेदन दिन आग्रह गरेको हो ।
गत पुस १६ गते बसेको प्राधिकरणको सञ्चालक समितिको बैठकले ६० महिनासम्मको किस्ताबन्दीमा बक्यौता महशुल बुझाउन पाउने व्यवस्था गरेको थियो । प्राधिकरणले पुस ६ देखि डेडिकेटेड र ट्रंकलाइनको बक्यौता महसुल नतिरेका उद्योगको बिजुली काट्दै आएको छ । प्राधिकरणले सोमबारसम्म बक्यौता नतिर्ने २४ वटा उद्योगको बिजुली काटिसकेको छ ।
केहि उद्योगले किस्ताबन्दीमा बक्यौता तिर्न सहमत हुँदै किस्ताबन्दी तिर्न थालिसकेका छन् भने अधिकांश उद्योगले आफुले बिजुली उपभोग गरेको प्रमाण प्राधिकरणले देखाए मात्र बक्यौता तिर्ने बताएका छन् । प्रमाण खोजेका उद्योगहरुले आफुले बिजुली नै नबालेको बताउदै आएका छन् ।
वि.सं.२०८० पुस २४ मंगलवार ११:२० मा प्रकाशित
