काठमाडौं । एशियन लाइफ इन्स्योरेन्स कम्पनी लिमीटेडले आफ्नो १६ औं वार्षिक साधारणसभा बोलाएको छ । सभा फागुन १८ गते शुक्रबार बिहान ११ः३० बजे बाराको सिमरास्थित होटल क्लासिकमा बोलाएको हो ।
साधारणसभाले कम्पनीको हाल कायम चुक्तापूँजीको ७.७५ प्रतिशत बोनस सेयर र कर प्रयोजनका लागि आवश्यक ०.४०७८ प्रतिशत नगद लाभांश वितरण सम्बन्धी प्रस्ताव पारित गर्नेछ ।
यस्तै, ७.७५ प्रतिशत बोनस सेयर वितरणपछि कायम हुने चुक्तापूँजीको ४२ प्रतिशत(१ः०.४२)को अनुपातमा हकप्रद सेयर जारी गर्ने प्रस्ताव समेत छलफल गरी पारित गर्नेछ । बोनस सेयर र हकप्रद वितरणपछिको हदसम्म जारी र चुक्तापूँजी स्वीकृतिको एजेण्डा समेत रहेको छ ।
सेयर संरचना परिवर्तनपछि सञ्चालक समितिको संरचनामा समेत परिवर्तन गर्नका लागि सञ्चालक समितिमा संस्थापक समूहबाट ३ जना, सर्वसाधारण समूहबाट २ जना र एकजना स्वतन्त्र सञ्चालक रहने गरी जम्मा ६ जनाको सञ्चालक समिति कायम रहने र सोही बमोजिम नियमावलीमा आवश्यक संसोधन गर्ने प्रस्ताव पनि पारित हुनेछ ।
साधारणसभा तथा लाभांश वितरण प्रयोजनका लागि फागुन ८ गते बुक क्लोज गर्ने भएको छ । यसर्थ फागुन ७ गतेसम्म कायम सेयरधनीले मात्र कम्पनी वितरण गरेको लाभांश प्राप्त गर्न र सभामा भाग लिन सक्नेछन् ।
वि.सं.२०८० माघ २५ बिहीवार ११:०३ मा प्रकाशित