काठमाडौं । रिडी पावर कम्पनीले हकप्रद शेयर बाँडफाँड गरेको छ। कम्पनीले माघ २१ गतेसम्म कायम शेयरधनीहरुलाई १ः०.५० अनुपातमा निष्काशन गरेको हकप्रद शेयर बाँडफाँड गरेको हो।
कम्पनीले प्रतिशेयर अंकित मूल्यका ७७ लाख ४४ हजार ५०६ कित्ता हकप्रद शेयर निष्काशन गरेको थियो। सोमध्ये ६० हजार ६०२ लगानीकर्ताले कुल ६६ लाख ८ हजार ८४९ कित्ता हकप्रद शेयरका लागि आवेदन दिएका थिए। सोही अनुसार चैत २० गते कम्पनीको सञ्चालक समितिले बाँडफाँड गरेको हो।
हकभन्दा बढी शेयर माग गरी दरखास्त दिएका आवेदकहरुको बाँडफाँडमा नपरेको हकप्रद शेयर बापतको रकम चैत २३ गतेदेखि आईपीएसमार्फत बैंक खातामा रकमान्तर गरिने व्यवस्था मिलाइएको कम्पनीले बताएको छ।
कम्पनीले आवेदन नपरेको ११ लाख ३५ हजार ६५७ कित्ता शेयर चैत २९ गतेदेखि शिलबन्दी बोलपत्र प्रक्रियामार्फत बिक्री गर्ने भएको छ। सो शेयर खरिदका लागि इच्छुक जो कोही व्यक्ति, कम्पनी, संघ, संस्थाहरुले वैशाख ९ गतेभित्र शिलबन्दी बोलपत्र पेश गर्नुपर्नेछ। यसमा न्यूनतम १०० कित्ता देखि अधिकतम सबै कित्ताका लागि आवेदन दिन सकिनेछ । कम्पनीको शेयर निष्काशन तथा बिक्री प्रबन्धक मुक्तिनाथ क्यापिटल लिमिटेड रहेको छ।
वि.सं.२०८० चैत २२ बिहीवार ०६:४९ मा प्रकाशित
