काठमाडौं । पिपुल्स पावर कम्पनीले ५० प्रतिशत हकप्रद सेयर जारी गर्ने भएको छ । सोही प्रस्तावसहित कम्पनीले छैंठौं र सातौं वार्षिक साधारण सभा वैशाख १७ गते गर्ने निर्णय गरेको हो । सभा लीसारा बैंक्वेट, नक्साल काठमाडौंमा बिहान १० बजेबाट सुरु हुनेछ ।
सभामा कम्पनीले ५० प्रतिशत हकप्रद सेयर निष्कासन गर्ने मुख्य एजेन्डा पेश गर्नेछ । सभामा कम्पनीको प्रबन्धपत्र तथा नियमावली संशोधन गर्ने अख्तियारी पनि सञ्चालक समितिलाई दिने प्रस्ताव रहेको छ ।
सभामा दुई आर्थिक वर्षको वार्षिक प्रतिवेदन तथा नाफा नोक्सान हिसाव र नगद प्रवाह विवरण लगायतका वित्तीय विवरणमा छलफल गरी पारित गर्नेछ । सभामा संस्थापक सेयरधनीहरुको तर्फबाट १ जना महिला सहित ५ जना र १ जना सञ्चालकको निर्वाचन गर्ने एजेन्डा पनि रहेको छ । आर्थिक वर्ष २०८०/८१ को लागि लेखापरिक्षक नियुक्त गर्ने एजेन्डा पनि रहेको छ ।
साधारण सभा प्रयोजनार्थ कम्पनीले चैत २९ गते बुक क्लोज गर्ने भएको छ । यसर्थ चैत २८ गतेसम्म कायम सेयरधनीले मात्र सभामा भाग लिन पाउनेछन् । कम्पनीलाई यसअघि नै ५० प्रतिशत हकप्रद सेयर बिक्री गर्ने विद्युत नियमन आयोगले पनि स्वीकृति दिएको छ । गत फागुन १९ गते बसेको बैठकले १ः०.५ अनुपातमा हकप्रद सेयर जारी गर्नका कम्पनीलाई अनुमति दिएको हो ।
वि.सं.२०८० चैत २२ बिहीवार ११:०६ मा प्रकाशित
