काठमाण्डौं । यस साता नेप्से सूचक ३८ अंकले बढ्यो भने क वर्गका कम्पनीको मापन गर्ने सेन्सिटिभ सूचक ८ अंकले बढेको छ। जसअनुसार विकास बैंक समूह सबैभन्दा धेरै अर्थात ८० अंकले बढेको छ। यो साता सेयर बजारका सबै सूचक तथा ९ वटै समूहहरु उक्लिएका छन्।
बिमामा ७३, जलविद्युतमा ३९, वाणिज्य बैंकमा ३६, फाइनान्समा २४ अंकको बृद्धि भएको छ। होटल समूह १७, उत्पादनमूलक समूह १३, अन्य १ र व्यापार समूह १ अंकले बढेका छन्।
यस साता नेपाल स्टक एक्सचेन्जमा १ सय ५० कम्पनीहरुको कारोबार भएको छ। ति कम्पनीको कारोबारबाट ८ अर्ब ३८ करोड ९ लाख रुपैयाँ बराबरका २ करोड २८ लाख कित्ता सेयरहरु खरिद बिक्री भएका छन् ।
कारोबार रकम गत साताको भन्दा ७ प्रतिशत बढि हो। गत साता १ सय ४७ कम्पनीहरुको ७ अर्ब ८२ करोड रुपैयाँको सेयरहरु खरिद बिक्री भएका थिए।
साताको नेप्से परिसूचक पहिलो दिनको तुलनामा ३८ अंकले बढेको छ। पहिलो दिन आइतबार १६ सय ८५ अंक रहेको नेप्से अन्तिम दिन १७ सय २३ अंकमा अंकमा पुगेको छ ।
यस साता कारोबार रकमका आधारमा एभरेष्ट बैंक अग्रस्थानमा रह्यो। सो कम्पनीको ३७ करोड ४३ लाख ७० हजार रुपैयाँको सेयर कारोबार भयो। त्यसैगरी दोस्रो स्थानमा रहेको लुम्बिनी जनरल इन्स्योरेन्सको ३२ र तेस्रोमा रहेको नेपाल बंगलादेश बैंकको २८ करोड ६६ लाख रुपैयाँको सेयर कारोबार भएको छ। नेपाल एसबीआई बैंक र एनएमबी बैंक पनि कारोबारका आधारमा उत्कृष्ट ५ कम्पनीभित्र पर्न सफल भए।
जलविद्युत लगानी तथा विकास कम्पनीको १० करोड कित्ता साधारण सेयर र मेरो माइक्रोफाइनान्सको २० लाख कित्ता साधारण सेयर बजारमा सूचीकृत भएको छ। जलविद्युत लगानीमा सर्वसाधारणतर्फको सेयर संख्या २ करोड कित्ता रहेको छ। लगानीकर्ताको बहुप्रतिक्षित विषय रहेको सो कम्पनीको ठूलो संख्यामा साधारण सेयरहरु बजारमा सूचीकृत भएकाले एक सातापछि समग्र बजारलाई यसले प्रभाव पार्ने अनुमान छ।
प्रकाशितः २०७३ असार १८
वि.सं.२०७३ असार १८ शनिवार ११:५१ मा प्रकाशित
