काठमाण्डौं । नेपाल स्टक एक्सचेञ्ज नेप्सेमा आजबाट मेरो माइक्रोफाइनान्स वित्तीय संस्था लिमिटेडको सेयर कारोबार खुलेको छ । कम्पनीको कारोबार कोड MERO रहेको छ ।
नेप्सेले कम्पनीको प्रतिकित्ता सेयर मूल्य न्यूनतम् १३१ रुपैयाँदेखि अधिक्तम ३९२ रुपैयाँ तोकेको छ । गत साता मेरो माइक्रो फाइनान्सले २० लाख कित्ता सेयर नेपाल स्टक एक्सचेन्जमा सूचीकरण गराएको थियो ।
कम्पनीले प्रति सेयर अंकित तथा चुक्ता मूल्य एक सय रुपैयाँ कायम भएको २० करोड रुपैयाँ बराबरको २० लाख कित्ता साधारण सेयर सूचीकरण गरेको हो । कम्पनीले ५ लाख ५६ हजार ९२० कित्ता सर्वसाधारण, कम्पनीमा कार्यरत कर्मचारीहरूलाई २४ हजार ४ सय ८० कित्ता तथा सामूहिक लगानी कोषहरुलाई ३० हजार कित्ता तथा कम्पनीका संस्थापकहरूले लगानी गरेको १३ लाख ८८ हजार कित्ता समेत गरी २० लाख कित्ता सेयर नेप्सेमा सूचीकरण गरेको हो ।
बजारमा माइक्रो फाइनान्स कम्पनीहरुको सेयर मूल्य बढिरहेको बेला मेरो माइक्रोफाइनान्समा पनि लगानीकर्ताको आकर्षण बढ्ने देखिन्छ ।
२१ असार २०७३, ११।००
वि.सं.२०७३ असार २१ मंगलवार १२:०३ मा प्रकाशित
