काठमाडौँ । वाणिज्य बैंकहरुले निक्षेप संकलनमा अपेक्षित वृद्धि नभएपछि कर्जा प्रवाहमा नियन्त्रण गरेको पाईएको छ ।
वाणिज्य बैंकहरुको छाता संगठन नेपाल बैंकर्स संघले सार्वजनीक गरेको पछिल्लो एक हप्ताको तथ्यांकमा यस्तो देखिएको हो ।
फागुनको चौथो साता अर्थात २० गतेदेखि २७ गतेसम्ममा वाणिज्य बैंकहरुमा जम्मा २ अर्ब निक्षेप थपिएको छ कर्जा एक अर्बले घटेको छ ।
अघिल्ला हप्ता तथा विगका महिनाहरुमा निक्षेप नथपिएपनि कर्जा प्रवाहमा निरन्तरता दिईरहेका बैंहरुले यो साता भने निक्षेप थपिएपनि कर्जा घटाएको देखिएको हो ।
फागुन महिनाको पहिलो साता ३ अर्ब स्वेदशी मुद्राको निक्षेप बढेको बैंकिङ प्रणालीमा दोस्रो सातामा एक अर्ब र तेस्रो साता ११ अर्ब रुपैयाँ स्वेदशी निक्षेप थपिएको थियो। फागुन महिनाको २० गते देखि २७ गतेसम्ममा मात्र एक अर्ब रुपैयाँ स्वेदशी निक्षेप थपिएको हो । साथै यसअवधिमा विदेशी निक्षेप पनि दुई अर्ब थपिएको छ।
तर, सोही अवधिमा विदेशी मुद्राको कर्जा लगानी भने निरन्तर घट्दो क्रममा देखिएको छ । फागुन महिनाको पहिलो सातामा ९ अर्बले घटेको विदेशी मुद्राको कर्जा दोस्रो सातामा पनि ९ अर्ब तथा तेस्रो साता ७ अर्बले घटेको थियो । फागुन महिनाको २० देखि २७ गतेसम्ममा विदेशी मुद्राको कर्जा ५ अर्बले घटेको छ ।
नेपाल राष्ट्र बैंकले विलासीताका बस्तुहरुको आयातमा गरेको कडाईका कारण आयातका लागि बुक गरिएका कर्जाहरु रद्द भएपछि कर्जा घटेको हो । त्यतीमात्र नभई आयातका लागि पनि विदेशी मुद्रा भन्दा पनि स्वदेशी मुद्रामा नै टिआर लोन जारी गर्न थालेकाले पनि विदेशी मुद्राको कर्जा घट्दो क्रममा देखिएको हो ।
चालु आर्थिक वर्षको फागुन महिनामा स्वदेशी र विदेशी मुद्राको कुल निक्षेप १५ अर्ब रुपैयाँ रहेको छ । त्यसैगरी सो अवधिमा १४ अर्ब रुपैयाँ कर्जा लगानी गरेका छन् । चालु आवको फागुन २७ गतेसम्ममा बैंकहरुमा कुल निक्षेप ४३ खर्ब २६ अर्ब रुपैयाँ रहेको छ भने ४१ खर्ब ६९ अर्ब रुपैयाँ कर्जा लगानी गरेका छन् ।
वि.सं.२०७८ फागुन ३० सोमवार १६:१७ मा प्रकाशित