काठमाडौं । विदेशी मुलुकहरुमा सुनका नेपाली मौलिक गहनाको माग बढ्दो क्रममा छ । नेपालबाट सुनको मौलिक गहनाहरु निर्यात वृद्धि भएको हो ।
चालु आर्थिक वर्ष २०७८/७९ को १० महिनामा नेपालीबाट ४६ करोड बढीको सुनका गहना बाहिरिएको छ ।
भन्सार विभागको तथ्याङ्क अनुसार चालु आवको बैशाख मसान्तसम्ममा विश्वका तीन मुलुकमा ४६ करोड ३१ हजार रुपैयाँ बराबरको सुनका मौलिक गहना निर्यात भएको हो ।
नेपालबाट हाल अमेरिका, हङकङ र अष्ट्रेलियमा नेपाली मौलिक सुनका गहनाहरु निर्यात हुँदै आएको छ । सुनका गहना नेपालबाट गत आवदेखि निर्यात हुन थालेको हो ।
चालु आवको बैशाख मसान्तसम्ममा ५२ हजार ८७३ ग्राम सुनका गहना बाहिरिएको भन्सार विभागले जनाएको छ ।
एक महिनाको अवधि अर्थात चालु आवको चैत मसान्तसम्मको तुलनामा भने सुनका मौलिक गहना निर्यात १४.५५ प्रतिशतले वृद्धि भएको हो ।
चालु आवको नौ महिनाको अवधिमा नेपालबाट ४० करोड १५ लाख ९४ हजार रुपैयाँ बराबरको ४६ हजार ४०८ ग्राम सुनका गहना बाहिरिएको थियो ।
विशेषगरी विदेशी मुलुकमा बन्न नसक्ने नेपाली मौलिक गर–गहना नेपालबाट निर्यात हुने गर्दछ । विभागका अनुसार पछिल्लो समयमा नेपालीहरुको बसोबास बढी भएका मुलुकहरुमा गहना निर्यात हुने गरेको छ ।
चालु आवको बैशाख मसान्तसम्ममा सबैभन्दा बढी सुनका गहना अमेरिका निर्यात भएको छ । उक्त देशमा बैशाख मसान्तसम्ममा ३९ करोड ९३ लाख ६५ हजार रुपैयाँ बराबरको सुनका गहना निर्यात भएको विभागले जनाएको छ । विभागका अनुसार अमेरिकामा ४४ हजार ७ ग्रामका सुनका गहनाहरु पुगेको हो ।
उक्त अवधिमा हङकङमा भने ५ करोड १८ लाख ७ हजार रुपैयाँ बराबरको ६ हजार ६१२ ग्रामको सुनका गहना निर्यात भएको विभागले जनाएको छ ।
यस्तै, अष्ट्रेलियामा भने १ करोड ८८ लाख ५९ हजार रुपैयाँ बराबरको सुनका गहना निर्यात भएको हो । उक्त देशमा १ हजार ५६१ ग्राम सुनको गहना पुगेको हो ।
वि.सं.२०७९ जेठ १९ बिहीवार १८:३३ मा प्रकाशित
