धनगढी । नयाँ शक्ति नेपालका संयोजक एबम् पूर्वप्रधानमन्त्री बाबुराम भट्टराईले प्रधानमन्त्री केपी शर्मा ओलीले देशको समृद्धिका लागि उठाएका मुद्दा सही भएको बताएका छन् ।
शुक्रबार दिउँसो धनगढी बजारमा प्रदेश नं ७ का कार्यकर्ताहरुको भेलालाई सम्बोधन गर्दै उनले ओलीका मुद्दा सही भएकाले हाँसी मजाकको विषय बनाउन नहुनेमा जोड दिए ।
‘हाँसो मजाकमा उडाए पनि आर्थिक सम्वृद्धि र देशको विकास गर्न प्रधानमन्त्री ओलीबाट उठाइएका मुद्दाहरु सही छन्’, उनले भने, ‘ओलीको देश विकास र आर्थिक समृद्धिको मुद्दालाई हाँसोको विषय बनाइनुहुन्न । देश विकासका लागि अब आर्थिक क्रान्तिको जरुरी भइसकेको छ ।
प्रधानमन्त्री ओली नौ महिने छोटो कार्यकालमा पनि सफल हुनुमा उनका सल्लाहकारहरुको ठूलो हात रहेको उनको भनाइ थियो । उनले सल्लाहकारहरुले राम्रो सुझाव दिएकाले ओलीले देश विकासको मार्गचित्र ल्याउन सकेको उल्लेख गरे ।
बाबुरामले भारतले दसगजा मिचेर बनाएका बाँधका कारण मधेसका बस्ती डुबानमा परेको बताउँदै विपत्तिमा परेका जनतासँग नयाँ शक्तिका कार्यकर्ता जोडिनुपर्नेमा जोड दिए ।
फरक प्रसंगमा बाबुरामले आआफ्नो नेतृत्वमा चुनाव गराउने मनशाय राखेर सरकार परिवर्तनको खेल भएको टिप्पणी गरे ।
डा भट्टराईले प्रत्यक्ष निर्वाचित राष्ट्रपति प्रणालीको व्यवस्था नभएसम्म देशमा राजनीतिक स्थिरता कायम हुन नसक्ने उल्लेख गर्दै यसका लागि राष्ट्रिय अभियान चलाएर जनमत तयार गर्नुपर्ने बताए ।कारोबार दैनिकमा खबर छ ।
वि.सं.२०७३ साउन १५ शनिवार १०:२२ मा प्रकाशित
