काठमाडौं । साउन १७ गते मंगलबार मन्दाकिनी हाइड्रोपावर कम्पनीको आईपीओ बाँडफाँड भएको छ ।
कम्पनीको आईपीओ बिक्री प्रबन्धक बिओके क्यापिटलको कार्यालयमा बाँडफाँड गरिएको हो । कम्पनीको आईपीओमा मागभन्दा बढी आवेदन परेकाले गोलाप्रथाबाट बाँडफाँड भएको थियो ।
कम्पनीको आईपीओ रितपूर्वक आवेदन दिने १ लाख ९ हजार ३ सय ७४ जनाले सेयर हात पारेका छन् । यी मध्ये ९ जनाले ११ कित्ता सेयर प्राप्त गरेका छन् भने बाँकै सबैले १०/१० कित्ता सेयर पाएका छन् ।
हाल कम्पनीको आईपीओ नेपाल स्टक एक्सचेञ्ज (नेप्से) मा सूचीकरण प्रक्रियामा रहेको छ । कम्पनीको आईपीओ पहिलो कारोबारका लागि १०२ रुपैयाँदेखि ३०६ रुपैयाँसम्मको ओपन रेञ्ज पाउने देखिएको छ ।
कम्पनीको आर्थिक वर्ष २०७७/७८ को वास्तविक प्रतिसेयर नेटवर्थ १०२ रुपैयाँ रहको छ । यसका आधारमा कम्पनीको आईपीओले पहिलो कारोबारका लागि १०२ रुपैयाँदेखि ३०६ रुपैयाँसम्मको ओपन रेञ्ज पाउने देखिएको हो ।
नेप्सेले कम्पनीको पहिलो कारोबारको लागि नेटवर्थको तीन गुणासम्म मूल्य रेञ्ज तोक्ने गर्दछ ।
कम्पनीले साउन ९ गतेदेखि सर्वसाधारणका लागि प्रतिकित्ता १०० रुपैयाँ अंकित दरका ११ करोड ७६ लाख ७३ हजार रुपैयाँ बराबरको ११ लाख ७६ हजार ७३ कित्ता आईपीओ निष्काशन गरेको थियो ।
जसमध्ये जारी पूँजीको २३ हजार ५२१ कित्ता सेयर कर्मचारीहरुका लागि, ५८ हजार ८०३ सेयर सामूहिक लगानी कोषका लागि र बाँकी १० लाख ९३ हजार ७४९ कित्ता साधारण सेयर सर्वसाधारणका लागि छुट्याइएको थियो ।
अन्तिम दिनसम्म कम्पनीको आईपीओमा १६ लाख १० हजार ९ सय २६ जना लगानीकर्ताहरूले १ अर्ब ८० करोड ८१ लाख १८ हजार रुपैयाँ बराबरको १ करोड ८० लाख ८१ हजार एक सय ८० कित्ताका लागि आवेदन दिएका थिए ।
वि.सं.२०७९ साउन १९ बिहीवार १६:११ मा प्रकाशित
