काठमाडौं । नेपाल इन्स्योरेन्स कम्पनीले चालु आर्थिक वर्षको दोस्रो त्रैमासिक वित्तीय विवरण सार्वजनिक गरेको छ ।
सार्वजनिक विवरण अनुसार इन्स्यारेन्सको खुद नाफा ४७.६५ प्रतिशतले बढेर चालु आर्थिक वर्षको दोस्रो त्रैमाससम्ममा १५ करोड ३२ लाख ७८ हजार रुपैयाँ पुगेको छ ।
गत वर्षको यसैअवधिमा यस इन्स्योरेन्सले १० करोड ३८ लाख १५ हजार रुपैयाँ नाफा कमाएको थियो । यसअवधिमा खुद बिमा शुल्क १० प्रतिशतले घटेर ३९ करोड १९ लाख ६० हजार रुपैयाँमा आएको छ ।
यसअवधिमा लगानी, कर्जा तथा अन्यबाट आम्दानी ९६.८० प्रतिशतले बढेर ११ करोड ४० लाख ७५ हजार रुपैयाँ पुगेपछि खुद नाफा सुधार भएको हो ।
बिमा कोषको आकार ३३.८७ प्रतिशतले बढेर ८२ करोड ९८ लाख ९ हजार रुपैयाँ पुगेको छ । यता, रिजर्भ कोषमा पनि सुधार भएको छ । गत वर्षको तुलनामा ५.४२ प्रतिशतले रिजर्भ कोष बढेर ४७ करोड ७७ लाख रुपैयाँ पुगेको छ ।
खुद नाफामा सुधार भएपछि नेपाल इन्स्योरेन्सको प्रतिसेयर आम्दानी ५ रुपैयाँ ५२ पैसाले बढेर २२ रुपैयाँ २३ पैसा पुगेको छ । यसको प्रतिसेयर नेटवर्थ भने १९४ रुपैयाँ ८२ पैसा छ ।
वि.सं.२०७९ माघ २६ बिहीवार १३:०१ मा प्रकाशित
