काठमाडौं । नेपाल राष्ट्र बैंकले लघुवित्त वित्तीय संस्थाहरुले बचत तथा निक्षेप खाता सञ्चालन गर्दा कुनै शुल्क लिन नपाउने बताएको छ । राष्ट्र बैंकले वित्तीय चेतनाका लागि एक सन्देश जारी गर्दै लघुवित्त संस्थाहरुले बचत तथा निक्षेप खाता सञ्चालन गरेबापत कुनै पनि किसिमको शुल्क लिन नपाउने बताएको हो ।
राष्ट्र बैंकले जारी गरिएको सन्देशमा भनिएको छ, ‘कर्जा प्रवाह गर्दा १.५० प्रतिशतसम्म मात्र सेवा शुल्क लिन पाउँछन्, एक वर्षभन्दा कम अवधिको कर्जा प्रवाह गरेमा वार्षिक १.५० प्रतिशतमा नबढ्ने गरी कर्जा अवधिको आधारमा दामासाहीले मात्र सेवा शुल्क लिन सक्छन्,’ ।
साथै, लघुवित्त वित्तीय संस्थाहरुले लिने सेवा शुल्कमा नेपाल राष्ट्र बैंकले सीमा तोकेको हुँदा बढी लिएमा गुनासो गर्न आग्रह गरेको छ ।
त्यसैगरी, लघुवित्त वित्तीय संस्थाले अन्य कुनै शुल्क मागेमा वा लिएमा सम्बन्धित संस्थाको गुनासो सुन्ने अधिकारीसमक्ष गुनासो दर्ता गर्नुपर्ने र उक्त संस्थाबाट गुनासो सुनुवाई नभएमा नेपाल राष्ट्र बैंकमा रहेको वित्तीय ग्राहक संरक्षण इकाइमा गुनासो दर्ता गर्न सकिने पनि राष्ट्र बैंकले बताएको छ ।
वि.सं.२०८० वैशाख २० बुधवार ०८:३४ मा प्रकाशित
