काठमाडौ । नयाँ दिल्लीबाट काठमाडौं उडान भरेको नेपाल वायु सेवा निगमको एयरबसमा एक्कासी धुवाँ आएपछि त्रिभुवन अन्तराष्ट्रिय विमानस्थलमा आकस्मिक अवतरण गरिएको छ ।
लुम्बिनी नामाकरण गरिएको एयरबस नेपालभित्रको सिमानामा प्रवेश गरिसकेपछि जहाजभित्र धुवाँ देखिएको थियो । चालकदलका सदस्यसहित १ सय ६३ जना यात्रु रहेको विमानले १२ हजार ५ सय फिट उचाईमा उडान भर्दैगर्दा धुवाँ देखिएको थियो ।
लगतै चालकदलले ३ः२९ मा काठमाडौं टावरलाई सम्पर्क गरी जहाजमा धुवाँ देखिएकाले आकस्मिक अवतरणका लागि अनुमति मागेको एयर ट्राफिक कन्ट्रोलले बताएको छ । त्यसलगत्तै विमानलाई आकस्मिक अवतरण गराईएको थियो ।
निगमको यो जहाज आकस्मिक अवतरण गर्ने बेलामा फ्लाई दुवइको जहाज पनि अवतरण गर्नै लागेको थियो। तर विमानस्थलले त्यसलाई डाइभर्ट गरेर लखनउ पठाएको थियो। यहाँबाट उड्न ठिक परेको भुटान एयरलाइन्सको जहाजलाई केही बेर रोकाइएको थियो।
आइतबार पनि दुवईबाट आएको निगमको अर्को जहाज प्राविधिक समस्या आएपछि आकस्मिक अवतरण गरिएको थियो।
विमानमा रहेका सबै यात्रु सकुशल ओर्लिएका छन् भने जहाजमा कुनै आगजनीको खतरा नभएपछि जहाजलाई विमानस्थलको पार्किङ–वेमा राखिएको छ ।
प्रकाशित मितिः २०७३ असोज १० गते
वि.सं.२०७३ असोज १० सोमवार १८:१४ मा प्रकाशित
