काठमाडौ । दशैं, तिहार छठ पर्वका समयमा राजधानीको सुरक्षा व्यवस्थालाई चुस्तदुरुस्त, त्रुटिरहित र मजबुत बनाउन प्रहरीले कुकुरको परिचालनदेखि पैदल गस्ती, सवारी गस्ती, साइकल गस्ती, मोटरसाइकल गस्ती र मोटर गस्ती गरिने भएको छ ।
महानगरीय प्रहरी परिसर काठमाडौँले पत्रकार सम्मेलन गरी सुरक्षाका लागितीन चरणको सुरक्षा योजना अवलम्बन गर्ने जानकारी दिएको हो ।
चाडपर्वमा जनतालाई सुरक्षा दिलाउन र विदेशबाट घर फर्कने एवं काठमाडौँ उपत्यकाबाट गन्तव्यमा जाने यात्रु समेतलाई पूर्ण सुरक्षाको सुनिश्चितता दिलाउन सुरक्षा रणनीति तय गरिने पनि प्रहरीले जानकारी दिएको छ ।
परिसरका प्रमुख वरिष्ठ प्रहरी उपरीक्षक विक्रमसिंह थापाका अनुसार चाडपर्वका लागि चार हजारभन्दा बढी जनशक्ति परिचालन गरिएको छ ।
चोरी, जुवातास, गुन्डागर्दी, पाकेटमारी नियन्त्रण गर्न राजधानी भित्रिने र बाहिरिने नाका, अर्थिक कारोबार हुने स्थान, ठूला पसल, गहना पसल, दशैं बजारलगायत स्थानमा सादा पोसाकमा समेत प्रहरी परिचालन गरिने छ । बढी भाडा असुल्ने, अत्यधिक यात्रु राखी सवारी साधन चलाउने, मिठाइ तथा खाद्य पदार्थमा हुने मिसावटको अनुगमन तथा नियन्त्रणसमेत प्रहरीले तीव्र पार्ने छ ।
यात्रुलाई सहज यात्रा गर्न र सुविधा दिन सुन्धारा, गौशाला र नयाँ बसपार्कमा दुई दुई स्थान तथा कोटेश्वर, बल्खु, कलङ्की र बालाजुमा एक एक स्थानमा गरी नौ स्थानमा प्रहरीको सहयोग कक्ष खडा गरिएको प्रहरीले जानकारी दिएको छ ।
प्रकाशित मितिः २०७३ असोज १४
वि.सं.२०७३ असोज १४ शुक्रवार १९:२० मा प्रकाशित
