बुटवल। नेकपा (एमाले)का अध्यक्ष केपी शर्मा ओलीले कसैको स्वार्थ पूरा गर्न संविधान संशोधन गर्न नसकिने बताएका छन् ।
उनले नेकपा (एमाले)ले संविधानको कार्यान्वयनको नेतृत्व गर्नेसमेत बताए। उनले भने“कार्यान्वयनका क्रममा अप्ठेरो आएमात्र संविधान संशोधनको विषय उठ्न सक्छ, कार्यान्वयन नहुँदै जनताको भावनाविपरीत एमालेले स्वीकार गर्दैन ।”
नेकपा (एमाले) ५ नम्बर प्रदेश कमिटीले बुटवलमा आयोजना गरेको प्रदेशस्तरीय अगुवा कार्यकर्ता भेलालाई सम्बोधन गर्दै अध्यक्ष ओलीले संविधान संशोधनको माग नेपालीको नभएको जिकिर गर्दै अरु कसैको मागलाई जनताले स्वीकार नगर्ने बताए ।
अहिले मुलुकको कार्यभार संविधान कार्यान्वयन गरी निर्वाचन गर्नु रहेकाले अन्य कुरामा नअल्झिन ओलीले कार्यकर्तालाई आग्रह गरे । भारतमै समेत कतिपय प्रदेश तराई र पहाड मिलेर बनेको उदाहरण दिँदै अध्यक्ष ओलीले तर नेपालमा तराईलाई पहाडसँग मिसाउनै हुँदैन भन्ने माग अनुचित रहेको उल्लेख गरे ।
कार्यक्रमलाई सम्बोधन गर्दै एमाले वरिष्ठ नेता झलनाथ खनालले संविधान कार्यान्वयनको विषयमा सिङ्गो पार्टी पङ्ति एकताबद्ध भएको उल्लेख गर्दै पहाड र मधेसलाई छुट्याउने गरी आउने कुनै पनि प्रस्ताव देशको हितमा नहुने बताए ।
पार्टीका महासचिव ईश्वर पोखरेलले २०७४ माघसम्म तीनै तहको निर्वाचन गराउने दिशामा सरकार नलागेर त्यसलाई अलमल्याउने र सत्ता टिकाउने दिशामा मात्र लागेको भन्दै देशलाई संवैधानिक जटिलतामा फस्न नदिन अब कार्यकर्ता पङ्क्तिबाट खबरदारी गर्नुपर्ने बेला आएको बताए ।
पार्टीका उपमहासचिव विष्णु पौडेलले ५ नम्बर प्रदेशलाई विभाजन गर्न खोजिए सडक आन्दोलनबाट त्यस्तो प्रयासलाई विफल पारिने चेतावनी दिए । उनले एमाले ५ नम्बर प्रदेश कमिटीले मङ्सिर महिनामा सम्पूर्ण कमिटीका बैठक, पुसमा प्रशिक्षण, माघमा घरदैलो र फागुनमा जनसभाको आयोजना गर्ने गरी योजना निर्माण गरेको जानकारी दिए ।
प्रकाशित मितिः २०७३ मंसिर ४
वि.सं.२०७३ मंसिर ४ शनिवार २०:०८ मा प्रकाशित
