४ असोज, काठमाडौं । भारतको अघोषित नाकाबन्दीका कारण इन्धन अभाव भएपछि बैंक तथा वित्तीय संस्थाहरु सञ्चालनमा समेत बाधा उत्पन्न भएको छ ।
अधिकांश बैंकले आफ्नो सन्ध्याकालीन सेवा बन्द गरेका छन् भने अब विद्युत भएको समयमा मात्र सेवा दिन सकिने उनीहरुले बताएका छन् ।
लोडसेडिङ हुँदा पनि २४ घण्टै चल्ने एटीएम सेवा पनि अब विद्युत भएका बेला मात्र उपभोग गर्न पाउने भएको छ ।
नेपाल बैंकर्स संघले बैंकहरुका लागि इन्धनको व्यवस्था गरिदिन राष्ट्र बैंकलाई आग्रह गेको छ । संघका अध्यक्ष उपेन्द्र पौडेलले भने, सेवा प्रभावित हुन नदिने हो भने राष्ट्रबैंकले इन्धन वा बिजुली उपलब्ध गराउनुपर्छ भनेर माग गरेका छौं ।’
विगतमा इन्धनको अभाव भएका बेला नेपाल आयल निगमले बैंकहरुका लागि इन्धन उपलब्ध गराउने गरेको थियो । तर, यो पटक भारतबाटै नआएका कारण निगमले पनि तेल दिन सक्ने अवस्था छैन ।
बैंकहरुले अहिले आफूसँग भएको तेल स्टक राकेर विद्युत भएको बेला मात्र सेवा दिने तयारी गरेका छन् । ‘अहिले भएको सबै सिध्याउँ र सकिएपछि बन्द गरौं भन्न त सकिन्छ । तर, यो राम्रो हुँदैन’ सघंका एक पदाधिकारीले भने, त्यसैले अधिकांश बैंकले अब विद्युत भएका बेला मात्र बैंक सञ्चालन गर्छन् ।’
अहिले लोडसेडिङ निकै कम भएकाले दिनमा केही घण्टा मात्र सेवा प्रभावित हुने बैंकर्सहरु बताउँछन् । साथै उनीहरुले बैंक तथा एटीएम जाँदा विद्युत भएको समयमा जान समेत सुझाएका छन् ।
यो बैंकमा पैसा भएर होइन । चाहिने भन्दा बढी नै पैसा छ र सेवा गर्ने चहना पनि छ । तर, अहिलेको मुलुकको समस्या पनि वुझ्नुपर्छ, एक पदाधिकारीले भने, आफ्नो क्षेत्रमा बत्ति छ, छैन त सबैलाई थाहा हुन्छ । त्यसैले वत्ति भएको समयमा बैंक जाने गर्नुभयो भने राम्रो हुन्छ भन्ने हाम्रो आग्रह छ ।
सार्वजनिक विदाको दिन बाहेक अरु दिन बैंकका कुनै पनि शाखा पूर्ण रुपमा भने बन्द नहुने नेपाल बैंकर्स एशोसिएसनले प्रष्ट पारेको छ ।
वि.सं.२०७२ असोज १४ बिहीवार १२:३५ मा प्रकाशित
