काठमाडौ । जनता बैंंकले सेयरधनीलाई १२ प्रतिशत बोनस सेयर दिने भएको छ । बैंकले फागुन १ गते साधारणसभा गर्ने सूचना जारी गर्दै उक्त प्रस्ताव गरेको हो । बैंकले दिने बोसन भर्खरै हकप्रद सेयर भर्नेहरुले भने पाउने छैनन् ।
बैंकले त्रिवेणी विकास बैंकसँग मर्ज भएपछि ६० प्रतिशत हकप्रदसमेत जारी गर्ने प्रस्ताव गरेको छ । बैंकले त्रिवेणीसँग मर्जमा जाने प्रस्ताव आगामी साधारणसभामा लैजाँदै छ । जनता बैंकको बोनसपछि चुक्ता पूँजीमा २४ करोड ७२ लाख रुपैयाँ थपिएर ३ अर्ब ७३ करोड ३२ लाख रुपैयाँ पुग्ने छ ।
त्रिवेणी विकास बैंकसँगै उसको चुक्ता पूँजी ९७ करोड ५८ लाख १७ हजार रुपैयाँ थपिने छ । दुवैको मर्जपछि जनता बैंकको चुक्ता पूँजी ४ अर्ब ७० करोडभन्दा माथि हुने छ । दुवै बैंक गाभिएपछि बैंकले जारी गर्ने ६० प्रतिशत हकप्रदले बैंकको चुक्त पूँजी ७ अर्ब ५३ करोड ४४ लाख नाघ्ने छ । बैंकले चालु आर्थिक बर्षको मुनाफाबाट बोनस सेयर जारी गरेर राष्ट्र बैंकले तोकेको ८ अर्ब चुक्ता पूँजी पुर्याउने तयारी गरेको छ ।
प्रकाशित मितिः २०७३ माघ ८
वि.सं.२०७३ माघ ८ शनिवार १२:५३ मा प्रकाशित
