काठमाण्डौं । नेपाली सेनाले ५० मेगावाटको प्रस्तावित दूधखोला जलविद्युत आयोजना निर्माणमा चासो देखाएको छ । अधिकारीहरुका अनुसार आफ्नो कल्याणकारी कोष खर्च गरेर आयोजना बनाउन इच्छा व्यक्त गर्दै आएको सेनाले केही समयदेखि मनाङको ठोचे स्थित यो आयोजनामा चासो देखाउँदै आएको थियो ।
जंगी अड्डाले रक्षा मन्त्रालयमार्फत विद्युत विकास विभागलाई पत्र लेख्दै २५ देखि ५० मेगावाट क्षमताको आयोजना निर्माण जिम्मा दिन माग गरेको थियो । आयोजनाका लागि हिमालयन ऊर्जा विकास कम्पनीले सर्भे लाइसेन्सका लागि विद्युत विकास विभागमा आवेदन दिएको छ । सरकारले सर्भे लाइसेन्स दिए दूधखोलालाई सेनाको पहिलो आयोजना रुपमा अघि बढाउने गृहकार्य गरिएको छ ।
नेपाली सेनाको कल्याणकारी कोषमा झण्डै ३२ अर्ब रुपैयाँभन्दा बढी रकम छ । ०३२ सालमा १ करोड राखेर स्थापना भएको कोषमा २०७३ असार मसान्तमा ३२ अर्ब पुगेको छ । कोषको धेरै रकम उपयोगहीन जस्तै बनेपछि ऊर्जा मन्त्रालयले सो रकम परिचालन गर्न सेनालाई प्रोत्साहन गर्दै आएको छ ।
त्यसो त, बजेट भाषणमा नै रोल्पाको १२।२५ मेगावाटको मादीखोला जलविद्युत आयोजना निर्माणको जिम्मा सेनालाई दिने घोषणा गरिएको थियो तर, यसमा अर्थ मन्त्रालयले सहमति दिएको थिएन ।
१ चैत २०७३, ११।००
वि.सं.२०७३ चैत १ मंगलवार ११:२५ मा प्रकाशित
