काठमाडौ । रियल मड्रिड स्ट्राइकर क्रिष्टियानो रोनाल्डो युएफा क्लब प्रतिस्पर्धामा एक सय गोल गर्ने पहिलो खेलाडी बनेका छन् । उनले १ सय ४३ खेलमा सय गोल गरेका हुन् । उनीपछि १ सय १८ खेल खेलेका लियोनल मेस्सीको ९७ गोल रहेको छ ।
च्याम्पियन्स लिग फुटबल अन्तर्गत क्वाटरफाइनलको पहिलो लेगमा रियल मड्रिडले वायन म्युनिखलाई २–१ गोल अन्तरले पराजित गरेको छ । जितमा दुबै गोल रोनाल्डोले गरेका थिए । योसँगै उनको युएफा क्लब प्रतिस्पर्धामा सय गोल पूरा भएको हो । वायनको घरेलु मैदानमा मड्रिडका लागि रोनाल्डोले खेलको ४७ औँ र ७७ औँ मिनेटमा गोल गरेका थिए ।
वायनविरुद्धको गोलसँगै च्याम्पियन्स लिगको ६ खेलमा गोलविहीन भएका रोनाल्डो लयमा फर्किएका छन् । उनले युएफा क्लब प्रतिस्पर्धा अन्तर्गत अहिलेसम्म च्याम्पियन्स लिगमा ९७, क्लब लिग क्वालिफायरमा एक साथै युरोपियन सुपर स्टारमा दुई गोल गरेका छन् ।
प्रकाशित मिति २०७३ चैत ३१
वि.सं.२०७३ चैत ३१ बिहीवार १३:५७ मा प्रकाशित
