इलाम । इलामको माई खोलामा निर्माण भएको ६.१ मेगावाटको माथिल्लो माई ‘सी’ जलविद्युत आयोजनाले वैशाखभित्र उत्पादन सुरु गर्ने भएको छ । माथिल्लो माईको क्यासकेडको रूपमा यो आयोजना निर्माण भएको हो । ‘ड्राइ टेस्ट (उपकरण)’ परीक्षण भएकाले यो महिनाभित्र बिजुली उत्पादन हुने पञ्चकन्या माई हाइड्रोपावर कम्पनीका कार्यकारी निर्देशक सन्तोसकुमार प्रधानले जानकारी दिए ।
‘आयोजना सम्पन्न गरेर ‘ड्राइ टेष्ट’ गरेका छौं,’ उनले भने, ‘चाँडै ‘वेट टेष्ट’ गरेर उत्पादन सुरु गनेर्छौं ।’ उनका अनुसार ९० करोड रुपैयाँ लागतमा यो आयोजना साढे २ वर्षमा सम्पन्न भएको हो । आयोजनामा नबिल बैंकको अगुवाइमा एभरेष्ट, ग्लोबल आइएमई र नेपाल बैंकको लगानी छ ।
उत्पादन सुरु भएपछि स्थानीयका लागि छुट्ट्याइएको १० प्रतिशत सेयर निष्कासन गरिने प्रधानले जानकारी दिए । ‘उत्पान सुरु भएलगत्तै स्थानीयका लागि सेयर निष्काशन गर्दैछौं,’ उनले भने, ‘यसका लागि धितोपत्र बोर्डसँग स्वीकृति लिने तयारी भइरहेको छ ।’
सेयर निष्कासन गर्न एनसीएम मर्चेन्ट बैकिङ र नबिल इनभेष्टमेन्ट बैंकिङलाई बिक्री प्रबन्धक तोकिएको छ । सेयरको बाँडफाँडपछि सर्वसाधारणका लागि निष्कासन गरिने उनले बताए । कम्पनीले यसअघि १२ मेगावाटको माथिल्लो माई निर्माण गरेको थियो । यसबाट गत असारबाट विद्युत उत्पादन गर्दै आएको छ ।
प्रकाशित मितिः २०७३ बैशाख ६
वि.सं.२०७४ वैशाख ६ बुधवार १०:३२ मा प्रकाशित
