४ सय ५६ मेगावाटको माथिल्लो तामाकोसी जलविद्युत आयोजनाको निर्माण २०७५ असारभित्रै पूरा गर्ने लक्ष्य राखे पनि कमजोर सडकका कारण उपकरण ढुवानीमा समस्या हुँदा काम प्रभावित हुने भएको छ ।
सडक विभागले सिन्धुपाल्चोकको खाडीचौरदेखि चरिकोटसम्मको सडक दुई लेनमा विस्तार तथा स्तरोन्नती गर्दैछ । यही कारण सडक साँधुरो हुँदा उपकरण ढुवानीमा समस्या देखिएको हो ।
बर्खाअघि आवश्यक उपकरण ढुवानी गर्न नसक्ने हो भने विद्युत उत्पादनको लक्ष्य प्रभावित हुने आयोजनाका प्रवक्ता गणेश न्यौपानेले बताए । ‘सडक विभागसँग निरन्तर परामर्श तथा सहकार्यमा काम गरिरहेका छौं,’ उनले भने, ‘आयोजनामा चार युनिट छन्, बर्खाअघि कम्तिमा दुई युनिटको उपकरण विद्युतगृहसम्म पुर्याउने योजना छ ।’
उपकरण ढुवानीको समस्याबाहेक हेडवर्क्स, पेनस्टकमा कंक्रिटिङलगायत काम पूरा गर्न बाँकी रहेको उनले बताए । आयोजनामा आवश्यक पेनस्टक पाइप, टर्बाइन, गेट, भल्बलगायत उपकरण ढुवानी गर्नुपर्छ । सयौं टनका उपकरण ढुवानीका क्रममा ट्रकले ‘लोड’ तान्न नसक्दा अहिले मुडेदेखि चरिकोटसम्म सडकका छेउमा राखिएको छ ।
अधिकांश उपकरण वीरगन्ज नाकामा आइसकेकाले आयोजनास्थलसम्म पुर्याउन चुनौती रहेको न्यौपानेले दोहोर्याए । आयोजना समयमै पूरा गर्न आवश्यक सहयोग तथा परामर्शका लागि आइतबार अप्पर तामाकोसी हाइड्रो पावर कम्पनीका सञ्चालक आयोजनास्थल पुगेका थिए ।
कर्मचारी सञ्चय कोष, राष्ट्रिय बिमा संस्थान, नेपाल दूर सञ्चार कम्पनी लगायतका प्रतिनिधिले आयोजना समयमै पूरा गर्न जस्तोसुकै सहयोग गर्न तयार रहेको प्रतिबद्धता जनाएका थिए । ७५ असारसम्म पहिलो युनिटमात्र भए पनि सञ्चालन गर्नुपर्नेमा उनीहरूले जोड दिए ।
नेपाल विद्युत प्राधिकरणका कार्यकारी निर्देशक तथा तामाकोसी सञ्चालक समितिका अध्यक्ष कुलमान घिसिङले पनि लक्षित समयभित्र पहिलो युनिट सञ्चालनमा ल्याउन निर्देशन दिएका थिए । यस्तै, २०७५ पुससम्म सबै युनिट अर्थात ४ सय ५६ मेगावाट विद्युत उत्पादन गर्नुपर्नेमा जोड दिए ।
२०६८ साल असारबाट निर्माण सुरु भएको आयोजनाको ८८ प्रतिशत काम पूरा भएको छ । १३ प्रतिशत काम पूरा गरेर २०७५ असारबाट उत्पादन सुरु गर्ने लक्ष्य छ । २ वर्षअघिको भूकम्प र भारतीय नाकाबन्दीको असरका कारण आयोजनाको काम डेढ वर्षसम्म ठप्प थियो ।उर्जाखबर डटकमबाट
प्रकाशित मितिः २०७४ बैशाख १२
वि.सं.२०७४ वैशाख १२ मंगलवार १७:२७ मा प्रकाशित
