काठमाडौ । व्यवस्थापिका संसदको वर्षे अधिवेशन सुरु भएको छ । सरकारको सिफारिसमा राष्ट्रपति विद्यादेवी भण्डारीले आह्वान गरे अनुसार सोमबार बसेको संसद बैठकमा सभामुख ओनसरी घर्तीले राष्ट्रपति कार्यालयबाट प्राप्त अधिवेशन शुरु सम्बन्धी पत्र पढेर सुनाइन् ।
त्यसपछि बैठक मंगलबार ११ बजेसम्मका लागि स्थगित भएको छ । मंगलबार र बुधबारको बैठकमा बजेट अघिको छलफल हुनेछ । सरकारले आउँदो बिहीबार नयाँ आर्थिक वर्षको नीति तथा कार्यक्रम संसदमा प्रस्तुत गर्ने छ ।
सरकारले राष्ट्रिय महत्वका ठूला विकासे परियोजना, संविधान कार्यान्वयन र पुनर्निर्माणलाई बढी जोड दिएर नीति तथा कार्यक्रम ल्याउने तयारी गरिरहेको बुझिएको छ । ११ गते बिहीबार नीति तथा कार्यक्रम सार्वजनिक भएपछि जेठ १५ गते बजेट सार्वजनिक गर्ने सरकारको तयारी छ ।
प्रकाशित मितिः २०७४ जेठ ८
वि.सं.२०७४ जेठ ८ सोमवार १६:२२ मा प्रकाशित