काठमाडौ । प्रधानमन्त्री पुष्पकमल दाहाल प्रचण्डले राजीनामा दिएका छन् । बुधबार देशबासीका नाममा सम्बोधन गर्दै प्रचण्डले राजीनामाको घोषणा गरे ।
बुधबार दिउँसो प्रधानमन्त्री तथा मन्त्रिपरिषद्को कार्यालय सिंहदबारबाट राष्ट्रका नाममा सम्बोधन गर्दै उनले राजीनामा घोषणा गरेका हुन् । २०७३ साउन १९ गते संसदमा ३ सय ६३ को बहुमत प्राप्त गरी दाहाल दोस्रोपटक मुलुकको ३९औं प्रधानमन्त्रीका रुपमा निर्वाचित भएका थिए । उनी २०६५ साल साउनमै पहिलो पटक प्रधानमन्त्री बनेका थिए ।
गत साउनमा सरकार गठन हुँदा नेपाली कांग्रेससँग भएको सहमतिबमोजिम प्रधानमन्त्री दाहालले पदबाट राजीनामा दिएका हुन् । सहमतिअनुसार अब कांग्रेस–माओवादी केन्द्रको गठबन्धनबाट कांग्रेस सभापति शेरबहादुर देउवा प्रधानमन्त्री हुने छन् । दुई पार्टीबीच स्थानीय तह निर्वाचन सम्पन्न गराउँदासम्म माओवादी अध्यक्ष समेत रहेको दाहालले सरकारको नेतृत्व गर्ने र त्यसपछि कांग्रेसलाई सत्ताको नेतृत्व हस्तान्तरण गर्ने समझदारी बनेको थियो ।
प्रकाशित मितिः २०७४ बैशाख १०
वि.सं.२०७४ जेठ १० बुधवार १६:३२ मा प्रकाशित
