काठमाडौ । साताको अन्तिम दिन बजार परिसूचक नेप्से ३.८० अंकले तल झरेर १६०४.३१ विन्दुमा आइपुगेको छ । यसअघि निर्वाचनपछि बजारमा पैसाको आप्रवाह बढ्ने अपेक्षा गरिएको थियो । पहिलो चरणको निर्वाचनपछि फेरि दोस्रो चरणको चुनाव पनि मिति तय भइसकेको छ । यस्तो अवस्थामा बजार सुस्त हुनुमा तरलता अभाव नै प्रमुख कारण मानिएको छ । बजार अझै कता जान्छ यसै भन्न सकिने अवस्था छैन । किनकि बजारमा सोचेभन्दा फरक परिमाण आईरहेको विश्लेषकहरु बताउँछन् ।
बिहीबार १४७ कम्पनीको ६४ करोड ९१ लाख रुपैयाँभन्दा बढीको सेयर कारोबार भएको छ । तुलनात्मकरुपमा यो कारोबार रकम न्यून हो । कुल ११ लाख ९२ हजार ९५८ कित्ता सेयर कारोबार भएको छ । बिहिबार उत्पादनमूलक र जलविद्युतबाहेक बाँकी सबै समूहका सूचक तल झरेका छन् ।
सबैभन्दा धेरै होटेल समूहको सूचक २५.३२ अंकले घटेको छ । यसैगरी, बिमा सूचक पनि १०.४९ अंकले तल झरेको छ । विकास बैंक समूहको ९.९५ अंकको गिरावट आउँदा वाणिज्य बैंक समूह १.७५ अंकले घटेको छ ।
कारोबार रकममा एसियन लाइफ इन्सुरेन्स संस्थापक सेयरले बाजी मारेको छ । एसियनको संस्थापक सेयर ६ करोड २३ लाख रुपैयाँभन्दा बढीको किनबेच भएको छ । कारोबार रकमका आधारमा स्टान्डर्ड चार्टर्ड बैंक र गुराँस लाइफ इन्सुरेन्स, हिमालयन जनरल इन्स्योरेन्स क्रमश दोस्रो तेस्रो चौथोमा परेका छन् ।
प्रकाशित मितिः २०७४ जेठ १८
वि.सं.२०७४ जेठ १८ बिहीवार १५:५० मा प्रकाशित
