काठमाडौं । गैर आवासिय नेपाली संघ (एनआरएनए) इटालीको महिला प्रतिनिधिमा रामकला पन्थ निर्विरोध निर्वाचित भएकी छिन् । सन् २०११ मा कामदार भिषामा युरोप पुगेकी उनी साहित्य र समाज सेवामा रुचि राख्छिन् । समसामयिक विषयमा लेख रचना सृजना गर्ने पन्थ डेढ वर्षदेखि अर्थतन्त्रडटकममा युरोप र आसपासका समसामयिक विषयमा लेख तथा फिचर लेख्दै आएकी छिन् । समाज शास्त्र र मानव शास्त्रमा स्नातकोत्तर गरेकी पन्थ नेपालमा छँदा विद्यालय तथा कलेजमा शिक्षण पेशामा आवद्ध थिइन् । उनी समाजको सन्तुलित विकासका लागि महिलाको क्षमताको पहिचान र विकास अपरिहार्य हुनु पर्नेमा आफ्ना विचारहरु राख्दै आएकी छिन् । महिला प्रतिनिधि निर्वाचित भएपछि खास गरी एनआरएनमा आवद्ध महिलाको सशक्तिकरणमा जोड दिने बताउँछिन् ।
शनिबार सम्पन्न निर्बाचनबाट महिला प्रतिनिधि पन्थ सहित उपाध्यक्ष, सचिव, कोषाध्यक्ष, युवा प्रतिनिधि र चार जना कार्यसमिति सदस्य निर्विरोध निर्वाचित भएका हुन् । अध्यक्ष, महासचिव र आइसिसि प्रतिनिधिमा भने निर्वाचन भएको हो ।
निर्विरोध हुनेमा उपाध्यक्षमा देवराज गुरुङ, सचिवमा झिम नारायण चापागाईं, कोषाध्यक्षमा अशोक उप्रेति युवा प्रतिनिधि फजिल अहमेद, महिला प्रतिनिधि रामकला पन्थ र कार्यसमिति सदस्यहरु प्रकाश महर्जन, सुजन कुमार बुढाथोकी, सबिन कुमार श्रेष्ठ र सुदिप अधिकारी रहेका छन् ।
अध्यक्षमा राजन चापाईं र दिपेश कुमार रेग्मी, महासचिवमा ईन्द्रप्रसाद सुवेदी र छविलाल कंडेल र आईसिसि प्रतिनिधिमा क्षेत्र कुमार श्रेष्ठ र हेमराज जोशी प्रतिस्पर्धामा छन् ।
करिव २२ सय नेपाली कार्यरत इटालीमा एनआरएनएमा ६ सय सात जना सदस्य रहेका छन् । इटालीभर पाँच वटा केन्द्रमा गरिएको मतदानमा ५ सय २६ मत खसेको छ । प्राप्त जानकारी अनुसार रोममा १८४, भेनिसमा ८२, पिसामा ७४, मिलानमा ९९ र पार्मामा ८७ मत खसेको छ । निर्वाचन भएका पदहरुको मत गणना कार्य चलिरहेको छ । मत परिणाम आए पछि केहीबेरमै महाविधेशन सम्पन्न हुने आयोजकले जनाएको छ ।
प्रकाशित मिति : ११ भदौ २०७४
वि.सं.२०७४ भदौ ११ आइतवार १२:३५ मा प्रकाशित
