काठमाडौ । साताको चौथो दिन बुधबार ११ अंक भन्दा बढिले उकालो लागेको सेयर साताको अन्तिम कारोबार दिन बिहिबार पुनः घटेको छ । नेपाल इन्भेष्टमेन्ट बैंकको बम्पर बोनस घोषणाले बुधबार बढाएको बजार विहीबार ११.९५ अंकले घटेर १५५४.५५ अंकमा झरेको छ । कारोबार भएका सबै समूह ओरालो लागेका छन् ।
विहीबार बुधबारको तुलनामा कारोबार रकम पनि घटेको छ । दिनभरिमा १५७ वटा कम्पनीको १२ लाख ८५ हजार ८ सय १५ कित्ता सेयर आठ हजार पाँच सय दश पटक खरिदविक्री हुँदा ७३ करोड ४९ लाख ५९ हजार रुपैंया बराबरको कारोबार भएको छ ।
बिहिबार नविल बैंक, नेपाल इन्भेष्टमेन्ट बैंक प्रोमोटर र निर्धन उत्थान बैंकको चार करोडमाथिको कारोबार हुँदा नेपाल इन्भेष्टमेन्ट बैंकको तीन करोड तथा आरएसडीसी लघुवित्त, नविल बैंक प्रोमोटर, सिद्धार्थ बैंक र सिभिल लघुवित्तको दुई करोडमाथिको कारोबार भएको छ । स्टान्डर्ड चार्टर्ड बैंक, नेपाल लाइफ इन्स्योरेन्स लगायतको एक करोडमाथिको कारोबार भएको छ ।
जम्मा ३३ वटा कम्पनीको सेयरमूल्य बढेको दिन सबैभन्दा धेरै सिन्धु विकास बैंकका सेयरधनीले ७.५३ प्रतिशतले कमाएका छन् भने मितेरी डेभलपमेन्ट बैंक र आरएसडीसी लघुवित्तका सेयरधनीले क्रमशः ६.६० र ५.३८ प्रतिशतले कमाएका छन् । जानकी फाइनान्स, निर्धन उत्थान बैंक, सेन्ट्रल फाइनान्स, मेरो माइक्रोफाइनान्स, तारागाउँ रिजेन्सी, नविल ब्यालेन्स फण्ड, स्वाबलम्बन विकास बैंक लगायतका सेयरधनीले पनि कमाएका छन् ।
यता, एक्सेल डेभलपमेन्ट बैंक, अरुण भ्याली हाइड्रो, युनाइटेड मोदी हाइड्रो, महिला सहयात्रा माइक्रोफाइनान्स र अपि पावर कम्पनीका सेयरधनीले ५ प्रतिशतभन्दा बढीका दरले गुमाएका छन् । ङादी ग्रुप पावर, हिमालयन डिस्टीलरी, बरुण हाइड्रो, रिलायबल माइक्रोफाइनान्स, तिनाउ डेभलपमेन्ट बैंक लगायतका सेयरधनीले पनि गुमाएका छन् ।
प्रकाशित मितिः २०७४ भदौ २२
वि.सं.२०७४ भदौ २२ बिहीवार १५:५९ मा प्रकाशित
